Shavkat Mirziyoyev taklifiga binoan Qozog‘iston prezidenti Qosim-Jo‘mart To‘qayev 21-dekabr kuni davlat tashrifi bilan O‘zbekistonga kelgani haqida xabar berilgan edi. Ular “Ko‘ksaroy” qarorgohining Faxriy mehmonlar xiyobonida daraxt ekdi, deb yozmoqda prezident matbuot xizmati.
Marosim O‘zbekiston—Qozog‘iston munosabatlarida yangi davr boshlanayotgani, mamlakatlar o‘rtasidagi strategik sheriklik va ittifoqchilikni qardosh xalqlarning farovonligi yo‘lida yanada mustahkamlashga qat’iy intilishning ifodasi bo‘ldi.
Qozog‘iston yetakchisining mamlakatga davlat tashrifi asosiy tadbirlari ertaga — 22-dekabr kuni bo‘lib o‘tadi.
Tashrif dasturiga muvofiq, oliy darajadagi muzokaralarda ikki tomonlama va mintaqaviy ahamiyatga molik dolzarb masalalar muhokama qilinadi. Sammit kun tartibidan O‘zbekiston—Qozog‘iston strategik sheriklik va ittifoqchilik munosabatlarini yanada chuqurlashtirish, o‘zaro savdo hajmini oshirish, sanoat kooperatsiyasi bo‘yicha o‘zaro manfaatli qo‘shma loyihalarni ilgari surish, qishloq xo‘jaligi, transport va logistika sohalaridagi hamkorlikni kengaytirish, faol hududlararo va madaniy-gumanitar almashinuvlarni davom ettirish kabi asosiy masalalar o‘rin olgan.
Davlat rahbarlari bir qator yirik investitsiya loyihalarini boshlab berishi rejalashtirilmoqda. Uchrashuvlar yakunida amaliy hamkorlikning ustuvor yo‘nalishlari bo‘yicha ikki tomonlama bitimlarning salmoqli to‘plamini qabul qilish ko‘zda tutilgan.
Mavzuga doir: O‘zbekiston, Qozog‘iston va Ozarbayjon avtomobil ishlab chiqaruvchilar konglomeratiga asos soldi
Izoh (0)