O‘zbekiston, Qozog‘iston va Ozarbayjon avtomobil ishlab chiqaruvchilar konglomeratiga asos soldi.
Qayd etilishicha, 65 milliondan ortiq aholiga ega bozorlarni bog‘laydigan konglomerat “Turkiy avtosanoat” deb nomlangan.
Ma’lumot uchun, 21-dekabr kuni Toshkentda bo‘lib o‘tgan O‘zbekiston—Qozog‘iston hududlararo biznes-forumida ikki davlat ishbilarmon doiralari o‘rtasidagi o‘zaro hamkorlikni rivojlantirishga qaratilgan umumiy qiymati 3 milliard dollardan ortiq bo‘lgan kelishuvlar imzolangandi.
Konglomerat turli sohalarda ishlaydigan bir nechta mustaqil kompaniyalardan tashkil topgan korporatsiya hisoblanadi. Ular sanoat yoki texnologik xususiyatlariga bog‘liq bo‘lmagan turli korxonalar, firmalar va kredit tashkilotlari birlashganda paydo bo‘ladi.
Avvalroq Shavkat Mirziyoyev taklifiga binoan Qozog‘iston prezidenti Qosim-Jo‘mart To‘qayev davlat tashrifi bilan O‘zbekistonga kelgani haqida xabar berilgan edi.
Tashrif dasturiga muvofiq, oliy darajadagi muzokaralarda ikki tomonlama va mintaqaviy ahamiyatga molik dolzarb masalalar muhokama qilinadi. Sammit kun tartibidan O‘zbekiston—Qozog‘iston strategik sheriklik va ittifoqchilik munosabatlarini yanada chuqurlashtirish, o‘zaro savdo hajmini oshirish, sanoat kooperatsiyasi bo‘yicha o‘zaro manfaatli qo‘shma loyihalarni ilgari surish, qishloq xo‘jaligi, transport va logistika sohalaridagi hamkorlikni kengaytirish, faol hududlararo va madaniy-gumanitar almashinuvlarni davom ettirish kabi asosiy masalalar o‘rin olgan.
Davlat rahbarlari bir qator yirik investitsiya loyihalarini boshlab berishi rejalashtirilmoqda. Uchrashuvlar yakunida amaliy hamkorlikning ustuvor yo‘nalishlari bo‘yicha ikki tomonlama bitimlarning salmoqli to‘plamini qabul qilish ko‘zda tutilgan.
Izoh (0)