Шавкат Мирзиёев таклифига биноан Қозоғистон президенти Қосим-Жўмарт Тўқаев 21 декабрь куни давлат ташрифи билан Ўзбекистонга келгани ҳақида хабар берилган эди. Улар «Кўксарой» қароргоҳининг Фахрий меҳмонлар хиёбонида дарахт экди, деб ёзмоқда президент матбуот хизмати.
Маросим Ўзбекистон—Қозоғистон муносабатларида янги давр бошланаётгани, мамлакатлар ўртасидаги стратегик шериклик ва иттифоқчиликни қардош халқларнинг фаровонлиги йўлида янада мустаҳкамлашга қатъий интилишнинг ифодаси бўлди.
Қозоғистон етакчисининг мамлакатга давлат ташрифи асосий тадбирлари эртага — 22 декабрь куни бўлиб ўтади.
Ташриф дастурига мувофиқ, олий даражадаги музокараларда икки томонлама ва минтақавий аҳамиятга молик долзарб масалалар муҳокама қилинади. Саммит кун тартибидан Ўзбекистон—Қозоғистон стратегик шериклик ва иттифоқчилик муносабатларини янада чуқурлаштириш, ўзаро савдо ҳажмини ошириш, саноат кооперацияси бўйича ўзаро манфаатли қўшма лойиҳаларни илгари суриш, қишлоқ хўжалиги, транспорт ва логистика соҳаларидаги ҳамкорликни кенгайтириш, фаол ҳудудлараро ва маданий-гуманитар алмашинувларни давом эттириш каби асосий масалалар ўрин олган.
Давлат раҳбарлари бир қатор йирик инвестиция лойиҳаларини бошлаб бериши режалаштирилмоқда. Учрашувлар якунида амалий ҳамкорликнинг устувор йўналишлари бўйича икки томонлама битимларнинг салмоқли тўпламини қабул қилиш кўзда тутилган.
Мавзуга доир: Ўзбекистон, Қозоғистон ва Озарбайжон автомобиль ишлаб чиқарувчилар конгломератига асос солди
Изоҳ (0)