Toshkentda 60 yoshli bloger Shohida Salomova tuhmat va haqoratda ayblanmoqda. Ijtimoiy tarmoqlarda “Patanatomiya strani Uz” Telegram-kanali administratori bo‘lgan ushbu bloger to‘satdan yo‘qolib qolgani haqida xabarlar tarqalgandi (ayni paytda ushbu Telegram-kanal o‘chirilgan).
Poytaxt IIBB matbuot xizmatining ma’lum qilishicha, Toshkent shahar IIBB Tergov boshqarmasiga 1970-yilda tug‘ilgan A.G. ariza bilan murojaat qilib, ijtimoiy tarmoqlarda unga tuhmat qilib, haqorat qilgan ijtimoiy tarmoq faoli fuqaro 1962-yilda tug‘ilgan Sh.S.ga nisbatan qonuniy chora ko‘rishni so‘ragan.
Murojaat asosida o‘tkazilgan tekshiruv jarayonida olingan ekspertiza xulosasiga ko‘ra, Sh.S. tomonidan A.G.ga nisbatan aytilgan audioyozuvlarda haqoratli so‘zlar mavjudligi aniqlangan.
Sh.S.ning harakatlarida Jinoyat kodeksining 139-moddasi 2-qismi (nashr qilish yoki boshqacha usulda ko‘paytirilgan tarzda, shu jumladan, ommaviy axborot vositalarida, telekommunikatsiya tarmoqlarida yoki internet jahon axborot tarmog‘ida joylashtirish orqali tuhmat qilish) va 140-moddasi 2-qismida (nashr qilish yoki boshqacha usulda ko‘paytirilgan tarzda, shu jumladan, ommaviy axborot vositalarida, telekommunikatsiya tarmoqlarida yoki internet jahon axborot tarmog‘ida joylashtirish orqali haqorat qilish) nazarda tutilgan jinoyat alomatlari mavjudligi sababli gumon qilinuvchi sifatida tergovga jalb qilingan.
Jinoyat ishi doirasida Sh.S.ning ruhiy holatini tekshirish maqsadida unga nisbatan sud-psixiatrik ekspertiza tayinlangan.
“Sud ajrimiga asosan gumon qilinuvchi Sh.S. tibbiy muassasaga joylashtirilgan. Tergov jarayonida barcha protsessual talablarga to‘liq rioya etilib, Sh.S.ning advokati tergov jarayonida ishtirok etishi uchun hech qanday moneliklar yo‘qligini ma’lum qilamiz. Hozirda tergov harakatlari davom etmoqda”, — deyiladi xabarda.
Izoh (0)