Shimoliy Koreya 18-dekabr, yakshanba kuni harbiy razvedkachi sun’iy yo‘ldoshni ishlab chiqish doirasida “muhim sinovlar”ni amalga oshirgan. Bu haqda Koreya Markaziy telegraf agentligi xabar berdi. Pxenyan bortida sinov qurilmasi bo‘lgan eltuvchi raketani qariyb 500 km balandlikka uchirgan.
Agentlik KXDR Aerokosmik texnologiyalar qo‘mitasi vakilining gaplarini keltirib o‘tgan, unga ko‘ra, sinovlardan maqsad “sun’iy yo‘ldoshdan tasvirga olish olish tizimlari imkoniyatlarini baholash”dan iborat bo‘lgan. Mutaxassislar qurilmaning koinot sharoitida ishlaganini, uning boshqaruv markaziga ma’lumotlar uzatish imkoniyatlarini va boshqa paramentrlarini tasdiqlagan.
Mansabdor aytishicha, Pxenyan ilk harbiy razvedkachi sun’iy yo‘ldoshini parvozga tayyorlash jarayonini 2023-yil apreliga kelib yakunlaydi.
Janubiy Koreyaning Yonhap agentligi xabariga ko‘ra, sinovlar KXDR shimoli-g‘arbidagi Soxe poligonida bo‘lib o‘tgan.
18-dekabr kuni Shimoliy Koreya Yapon dengizi tomon noma’lum ballistik raketani uchirgani haqida Janubiy Koreya va Yaponiya OAVlari xabar bergandi. Yaponiya qirg‘oq qo‘riqlash boshqarmasi taxminan yarim soatdan keyin ikkinchi ballistik raketa uchirilganini ma’lum qildi. Ikkala raketa ham Yaponiyaning eksklyuziv iqtisodiy zonasidan tashqariga qulagan.
16-dekabr kuni esa Shimoliy Koreya “yangi turdagi strategik qurol tizimi” uchun “katta tortish kuchiga ega qattiq yonilg‘ili dvigatel”ni muvaffaqiyatli ravishda sinovdan o‘tkazdi. KMTA ma’lumotlariga ko‘ra, sinovga Shimoliy Koreya yetakchisi Kim Chen In rahbarlik qilgan. U “eng qisqa muddatlarda yangi turdagi yana bitta strategik qurol yaratilishi”ga umid bildirdi.
Izoh (0)