Shimoliy Koreyaga qarshi joriy qilingan sanksiyalar mamlakatda harbiy sun’iy yo‘ldoshlarni ishlab chiqarish va rivojlantirishga to‘siq bo‘la olmaydi, deyiladi KXDR yetakchisining singlisi, Koreya Mehnat partiyasi Markaziy qo‘mitasi bo‘lim boshlig‘i o‘rinbosari lavozimini egallab turgan Kim Yo Chjon bayonotida. Bayonot Koreya markaziy telegraf agentligida chop etildi.
“Bizning yashash va rivojlanish huquqimiz tahdid ostida. Shundoq ham qachonlardan beri boshdan kechirayotgan sanksiyalardan nega qo‘rqishimiz kerak? Biz suveren davlatning qonuniy huquqlari qanday tortib olinayotganini indamay kuzatib o‘tirmaymiz, kerak bo‘lsa, hayotimiz evaziga bo‘lsa ham huquqlarimizni tiklaymiz”, — deyiladi bayonotda.
Kim Yo Chjon harbiy sun’iy yo‘ldoshlar ishlab chiqarishni mamlakatning xalq xavfsizligi bilan bevosita bog‘liq bo‘lgan ustuvor yo‘nalishi deb atadi.
Koreya markaziy telegraf agentligi, shuningdek, KXDR Tashqi ishlar vazirligi vakilining bayonotini ham chop etdi. Unda aytilishicha, Yaponiyaning yangi xavfsizlik strategiyasi “boshqa davlatlarga qarshi hujum qobiliyatiga egaligini rasmiylashtiradi” hamda Koreya yarim oroli va Sharqiy Osiyoda katta xavfsizlik inqirozini keltirib chiqaradi.
“Yaponiyaning qayta qurollanishi BMT nizomini qo‘pol ravishda buzish va xalqaro tinchlik va xavfsizlikka jiddiy tahdid”, — deyiladi xabarda. Unda ta’kidlanishicha, KXDR Yaponiyaning harakatlaridan xavotirda ekanini ko‘rsatish uchun “amaliy harakatlar” qiladi.
18-dekabr kuni KXDR harbiy razvedka sun’iy yo‘ldoshini yaratish doirasida “muhim sinovlar” o‘tkazdi, uning maqsadi “sun’iy yo‘ldoshdan suratga olish tizimlarining maqsadga muvofiqligini baholash” edi. Pxenyan bortida sinov mashinasi bo‘lgan kuchaytiruvchi raketani taxminan 500 km balandlikka uchirgan. Pxenyan birinchi harbiy razvedka sun’iy yo‘ldoshini uchirishga tayyorgarlikni 2023-yil apreligacha yakunlaydi.
O‘sha kuni Janubiy Koreya harbiylari va Yaponiya hukumati Pxenyan Yapon dengizi tomon o‘rta masofaga mo‘ljallangan ikkita ballistik raketani uchirgani haqida xabar berdi. Ular maksimal 550 km balandlikda taxminan 500 km masofani bosib o‘tgan va Yaponiyaning eksklyuziv iqtisodiy zonasidan tashqariga tushgan. Tokio Pxenyanga norozilik bildirdi.
Izoh (0)