Toshkent shahar hokimligi yangi quriladigan uylardan xonadon sotib olishda ogoh bo‘lishga chaqirdi

Toshkent hokimligi davlat ekspertizasidan o‘tmagan yangi uylardan kvartira sotib olishdan ogoh bo‘lishga chaqirdi.

Poytaxt hokimligi matbuot xizmatining ma’lum qilishicha, hozirgi kunda ayrim quruvchi tashkilotlar qurilish loyihasi hududiy arxitektura va shaharsozlik kengashi tomonidan tasdiqlanmagan va ekspertizadan o‘tmagan ko‘p kvartirali uylardagi xonadonlarni “qurib berish” shartlarida sotishni taklif etmoqda.

Aksariyat hollarda, bunday xonadonlarni sotib olishga shartnoma tuzganlar xonadonni o‘z nomiga ro‘yxatdan o‘tkazish, ichimlik suvi, tabiiy gaz va elektr tarmoqlariga ulashda qiyinchiliklarga duch kelmoqda.

Xususan, Taras Shevchenko ko‘chasi, 23-uy manzilida barpo etilishi rejalashtirilgan “DAhO ko‘p funksiyali majmuasi” bo‘yicha reklama qilinayotgan 5 ta ko‘p kvartirali uylar loyihasi bo‘yicha hududiy arxitektura va shaharsozlik kengashi qarori olinmagan va davlat ekspertizasidan o‘tkazilmagan bo‘lsa-da, quruvchi tashkilot xonadonlar sotuvini joriy yil dekabr oyidan boshlab yuborgan.

“Yangi quriladigan uylardan xonadon sotib olishda “sizga taklif etilayotgan qurilishi rejalashtirilgan uy” qurilish loyihasi hududiy arxitektura va shaharsozlik kengashida ko‘rib chiqilib, davlat ekspertizasidan o‘tkazilganligi to‘g‘risidagi hujjatlar bilan tanishing.

Loyihasi kelishilmagan, davlat qurilish ekspertizasidan o‘tkazilmagan uydan kvartira sotib olib, o‘zingizni uzoq davom etadigan muammolarga duchor qilmang. O‘z vaqtingizni, mablag‘ingizni sarflashda talabchan bo‘ling”, — deyiladi xabarda.

Mavzuga doir:

• Mirobodda eng qimmat: Toshkentda noyabr oyi uchun uylar narxi tahlil qilindi
• O‘zbekistonda eski uylarning narxi noyabr oyida ham o‘sgani ma’lum bo‘ldi
• O‘zbekistonda ko‘chmas mulkka bo‘lgan huquqlarni davlat ro‘yxatidan o‘tkazish to‘g‘risidagi qonun imzolandi