DXX Toshkent viloyatining Yuqori Chirchiq tumanida ikki nafar fuqaro dala hovlida yashirin narkolaboratoriya tashkil etib, sintetik narkotik modda tayyorlab, sotish bilan shug‘ullanganlarni aniqladi.
O‘zAning xabar qilishicha, dala hovlida 1 kilogramm 12 gramm “Mefedron” sintetik giyohvandlik vositasi, kimyoviy suyuqliklar va boshqa zarur uskunalar topilgan. Shuningdek, bu shaxslarning biriga tegishli “kafe”da 18 gramm opiy, 33 gramm gashish, 2 gramm “Mefedron” narkotik moddalari borligi aniqlangan.
Bu shaxslar Telegram orqali mijoz topib, narkotik moddalarni xufiya joylarga yashirib ketish orqali sotgan. Tadbir davomida 15 ta xufiya joyga sotish maqsadida 7 gramm “Mefedron” va 8 gramm gashish narkotik moddalari yashirilgani aniqlangan.
Qonunbuzarlar jinoiy harakatlariga farg‘onalik kimyogarni ham jalb etgan. Kimyogar elementlardan foydalangan holda giyohvandlik vositasini tayyorlagan. Narkotiklarni xufiya joylarga joylashtirish bilan esa Yuqorichirchiq tumanida yashovchi shaxs shug‘ullangan.
Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.
Mavzuga doir: Farg‘onadagi xonadonda 21,5 kilo giyohvand modda ko‘mib qo‘yilgani aniqlandi (video)
Izoh (0)