Qashqadaryo viloyati hokimi Murodjon Azimovning talaba yoshlar bilan uchrashuvida hokimga tanqidchi blogerlarga qarshi jamoa tuzishni va ularga munosib javob qaytarishni taklif qilgan talaba qiz fikri noto‘g‘ri talqin qilinayotganini aytmoqda. Bu haqda u “Daryo” muxbiri bilan muloqotida ma’lum qildi.
Hokimga ko‘ngilli yoshlardan iborat blogerlar jamoasini tuzish taklifini men bergandim. Bu fikrlarim jamoatchilik muhokamasiga sabab bo‘layotganini ko‘rib, kuzatib turibman. Ko‘pchilikning fikrini o‘qib chiqdim. O‘sha tadbirda viloyat hokimining ko‘p vaqtini olmaslik uchun fikrimni oxirigacha bayon qilolmadim. Bu esa gaplarim noto‘g‘ri talqin qilinishiga sabab bo‘lmoqda, — deydi talaba qiz Sitora Jalilova.
Suhbatdoshning aytishicha, u blogerlar jamoasini tuzish taklifini berganda kimnidir oqlash yoki qoralashni nazarda tutmagan.
Men bu gaplarim — taklifim bilan aynan kimnidir qoralash yoki oqlashni aytmadim. Ba’zi bir holatlarda voqeani bo‘rttirib gapirib, viloyatimiz sha’niga yomon gaplar aytayotgan, bunga huquqi bor yoki yo‘qligini bilmay holatga noto‘g‘ri yondashayotgan blogerlar voqeaga ijobiy yondashish ham kerak degan ma’noda gapirdim, — deydi u.
Suhbatdosh “Daryo” muxbirining “Qo‘shtirnoq ichidagi ayrim blogerlar deganda aynan kimlarni nazarda tutgansiz?”, “Tanqidiy masalalarga noto‘g‘ri yondashgan blogerlarning birortasi ismini aytolasizmi? ”, degan savollarini ochiq qoldirdi.
Talaba qiz blogerlar jamoasini tuzishdan maqsadi jamoa a’zolari chekka-chekka qishloqlarga borib, tumanlarga tarqalgan holda kamchiliklarni o‘rganishi va ularga yechim topilishiga ko‘maklashishi nazarda tutganini aytmoqda.
Men blogerlar jamoasi chekka-chekka hududlardagi muammolarni o‘rganib, mas’ullarga kiritgan holda ularning yechim topilishida ko‘maklashadi degan mazmunda bu taklifni bergandim. Men ham oddiy qishloq qiziman. Mening qishlog‘imda kamchilik yo‘q deysizmi? Bizga o‘xshagan yoshlar birlashsak, kamchiliklarni ijobiy hal etishda o‘z hissamizni qo‘shsak nimasi yomon?, — deydi Sitora Jalilova.
Sitoraning qo‘shimcha qilishicha, u o‘z bilimi bilan OTM talabasi bo‘lgan.
Oliygohni tamomlasam, bilimim bilan ishga kirolaman. Yosh qiz oldinga bir qadam tashlab yuraman desa, unga birdan tosh otish yaxshi emas. Hokimimiz mendek oddiy bir talaba qizga imkon berib ko‘ryapti. Bu ishonchni munosib oqlayman. Iltimos, bir-birimizni hurmat qilaylik, — deydi suhbatdosh.
Gaplari jamoatchilik muhokamasiga sabab bo‘layotgan qiz jamoatchilikdan fikrini noto‘g‘ri tushunmaslikni so‘ramoqda.
Nimaki gapirgan bo‘lsam, yaxshi niyat bilan gapirdim. Hali yoshman tajribam kamdir, ammo harakat qilib ko‘rishga haqqim bor-ku, — deydi u.
Eslatib o‘tamiz, Sitora Jalilovaning hokim bilan muloqotida ilgari surgan tashabbusi jamoatchilik e’tirozi-yu, muhokamasiga sabab bo‘lgach, viloyat hokimligi axborot xizmati rahbari Ahror Sodiqov qizning gaplari oddiy taklif ekanini, qolaversa talaba ishga qabul qilingan taqdirda ham lavozimi doirasidagi ishni olib borishini aytib, “Masalan, hokimlikning ijtimoiy bo‘limiga ishga o‘tsa, ta’lim va sog‘liqni saqlash sohasida, turizm bo‘limiga ishga o‘tsa, turizm sohasini rivojlantirish borasida ish olib boradi”, — degandi.
Izoh (0)