Qashqadaryoda talaba noo‘rin tanqidlarga javob qaytaruvchi blogerlar jamoasi tuzishni taklif qilgani va bunga javoban viloyat hokimi Murodjon Azimov tomonidan viloyat hokimligiga ishga qabul qilingani xabar berilgandi. Mazkur xabar jamoatchilik muhokamasiga sabab bo‘lgach, viloyat hokimligi mazkur masalaga munosabat bildirdi.
Kecha viloyat hokimi Murodjon Azimov Qarshi davlat universitetida bo‘lib, talaba-yoshlar bilan ochiq muloqot qildi. Ularning taklif va muammolarini tingladi. Ushbu jarayonda jurnalistika sohasiga qiziquvchi, bir qator nashrlarda o‘zining tahliliy maqolalari bilan yurtimizda amalga oshirilayotgan ijobiy o‘zgarishlarni yoritib kelayotgan talaba-qiz o‘z taklifini bildirdi. Uning ta’kidlashicha, sohaga qiziquvchi ko‘ngilli talaba-yoshlardan iborat “Yosh blogerlar” jamosini tuzish va ular uchun zarur bo‘ladigan moddiy-texnika vositalari bilan ta’minlash taklifini bildirdi. Shu joyda viloyat hokimi taklif yuzasidan biror fikr bildirgan emas. Qizning taklifiga e’tibor bersangiz, “AOKA viloyat boshqarmasi qoshida tashkil etsak”, degan jumlalar bor. Bu taklif, xolos, — deydi viloyat hokimligi axborot xizmati rahbari Ahror Sodiqov.Ta’kidlanishicha, viloyat hokimi talaba-qizning boshqa masalalarda bergan fikrlari, muloqot davomida faol bo‘lganligini hisobga olib, uni viloyat hokimligiga ishga qabul qilishini aytgan.
Talaba ishga qabul qilingan taqdirda ham lavozimi doirasidagi ishni olib boradi. Masalan, hokimlikning ijtimoiy bo‘limiga ishga o‘tsa, ta’lim va sog‘liqni saqlash sohasida, turizm bo‘limiga ishga o‘tsa, turizm sohasini rivojlantirish borasida ish olib boradi, — deydi mas’ul.Hokimlik axborot xizmati viloyat hokimi tomonidan talaba qizga ish taklif qilinganini yoshlarga berilayotgan e’tibor, ularning intilish, tashabbuslarini qo‘llab-quvvatlash va shu orqali, boshqa yoshlarga ham motivatsiya berishdan iborat ekanligini aytmoqda.
Shuni alohida ta’kidlash lozimki, yoshlar, xususan, talabalarni ishga joylashtirish, ularning qo‘shimcha daromad topish bo‘yicha tashabbuslarini qo‘llab-quvvatlash doimo viloyat hokimining e’tiborida bo‘lib kelmoqda. Xususan, joriy yilning 11 oyi davomida hozirda talaba sifatida kunduzgi bo‘limda o‘qiyotgan uch mingga yaqin yoshlarni ishga joylashtirilgani bu borada olib borilayotgan ishlarning yaqqol namunasidir. Yoshlarni, talabalik davridan, davlat xizmatiga jalb qilish, olgan nazariy bilimlarini amaliyot orqali yanada mustahkamlanishi albatta, yaqin kelajakda o‘z mevasini beradi. Demoqchi bo‘lganimiz, bu qizning ishga olinishi ochiq muloqotda bergan taklif bilan bog‘liq emas. Viloyat hokimi va jamoasi har doim xolis OAV uchun ochiq va ushbu ochiqlik bo‘yicha olib borilayotgan siyosat hech qachon ortga qaytmaydi, — deydi Ahror Sodiqov.
Izoh (0)