O‘zbekistonda yuzaga kelgan elektr energiya tanqisligi va tabiiy gaz yetishmovchiligi bois hududlardagi metan gaz zapravkalari ishlamayotgani, faoliyat yuritayotganlarida ham turnaqator navbatlar yuzaga kelgani, oqibatda esa bu yo‘lkira narxlariga ta’sir qilgani xabar berilgandi.
“Daryo”ning Qashqadaryo viloyatidagi muxbiri Murodjon Amirov hududda yo‘lovchilar va haydovchilar bilan suhbatlashib, vaziyatni o‘rgangan edi. Biroq o‘rganishlar davomida muxbir o‘zini qiziqtirgan savollarga viloyat Transport boshqarmasi mas’ullaridan javob ololmagandi.
Maqola e’lon qilingach, Qashqadaryo viloyat Transport boshqarmasi mas’ullari holatga izoh berdi.
Yurtimizda yuzaga kelgan energoresurslar taqchilligi bilan bog‘liq vaziyatning jamoat transporti sohasiga salbiy ta’sirini kamaytirish maqsadida zarur ishlar qilinmoqda. Xususan, viloyatimizda ham yo‘lovchi tashuvchi transport vositalari (avtobus, mikroavtobus, Damas) muntazam qatnovini tashkil etish uchun barcha chora ko‘rilyapti. Viloyat hokimligi boshchiligida ishlab chiqilgan ish rejaga asosan, har bir shahar va tumanda alohida yonilg‘i quyish shoxobchalari tanlab olinib, ularga tashuvchi korxonalarni biriktirish hamda avtobus va yo‘nalishli taksilar uchun maxsus yo‘lak tashkil etish belgilangan, — deydi boshqarma axborot xizmati rahbari Mirzohid Jo‘rayev.Mas’ulning ta’kidlashicha, viloyatda jamoat transportlarida yo‘lkira narxi oshmagan.
Ko‘rilayotgan choralar natijasida har kuni avtobus, yo‘nalishli taksi (mikroavtobus va Damas)larning qatnovga to‘laqonli chiqishi, harakat jadvallariga amal qilinishiga erishilyapti. Jamoat transportida yo‘lkiraning asossiz oshishining oldi olinyapti. 12-dekabr holatiga ko‘ra, viloyat bo‘yicha 286 ta avtobus, 25 ta mikroavtobus va 1700 dan ortiq Damas yo‘nalishlarga chiqarilgan. Bu esa yo‘nalishlarda qatnovni amalga oshirishi kerak bo‘lgan jamoat transporti umumiy tarkibining qariyb 90 foizini tashkil etadi, — deydi u.Mirzohid Jo‘rayevning qo‘shimcha qilishicha, viloyat hokimi qarori bo‘yicha shahar ichida avtobus kishi boshiga 1500 so‘m olsa, mikroavtobus har bir kishiga 2000 ming so‘mga xizmat ko‘rsatadi.
Shahar atrofi va tumanlarga qatnaydigan avtobuslar kilometrajiga tarif qo‘yadi. Hozir Damas yo‘nalishlarida tarif elektron tender natijasi bo‘yicha belgilanmoqda. Agar tashuvchi kilometriga 100 so‘m taklif qilsa va yo‘nalishni yutib olsa, shu tarif bo‘yicha yurishga majbur. Qaysidir Damas uyushmalari elektron tenderda kilometriga 250 so‘m taklif qilgan holatlar ham bor, ya’ni bu 10 kilometrga 2500 so‘m bo‘ladi degani. Yo‘nalishsiz taksilar ya’ni sariq rangli tashuvchilarga aniq bir tarif ishlab chiqilmagan. Hukumat qarori yoki biror normativ hujjat bilan, o‘zaro kelishuv asosida deyilgan, — deydi Mirzohid Jo‘rayev.Shuningdek, viloyatning barcha tuman va shaharlarida jamoat transportlari uchun maxsus metan gaz shoxobchalari ajratilgan bo‘lib, odam tashuvchi transport vositalariga navbatsiz gaz quyib berilishi hokimliklar nazoratiga olingan.
Izoh (0)