Benzinning arzonlashishi Andijon va Namanganda navbatlarni yuzaga keltirgan bo‘lsa, Farg‘ona va Qoraqalpog‘istonda yonilg‘ining “yo‘qolib qolishi”ga sabab bo‘ldi (foto, video)

O‘zbekistonda kuzatilgan elektr energiya taqchillik va tabiiy gaz yetishmovchiligi hududlardagi metan gaz zapravkalarida turnaqator navbatlarga, ayrim zapravkalar faoliyatining to‘xtatilishiga olib keldi. Shundan so‘ng haydovchilarda muqobil yonilg‘i — benzinga talab ortdi.

Haydovchilarning benzinga muhtojligi va aholining transportga bo‘lgan ehtiyojidan kelib chiqib, bu borada prezidentning AI-80 rusumli avtobenzin mahsulotini aksiz solig‘idan ozod qilish bo‘yicha maxsus qarori qabul qilindi. Mazkur qarordan kelib chiqib “O‘zbekneftgaz”ga qarashli benzin zapravkalarida AI-80 markali benzin narxi 5700 so‘mga tushdi.

Sir emaski benzinning arzonlashishi nafaqat viloyatlarda poytaxt Toshkentda ham turnaqator navbatlar yuzaga kelishiga sabab bo‘ldi. “Daryo” ijodiy jamoasi 13-dekabr kuni viloyatlarda shu markadagi benzin qaysi narxda sotilayotgani bilan qiziqdi.

Namangan

“Daryo”ning Namangan viloyatidagi muxbiri Azizbek Abduvaliyevning ma’lumot berishicha, viloyatdagi “O‘zbekneftgaz” shoxobchalarida AI-80 markali benzin 5700 so‘mdan sotilmoqda, ammo ularga navbat metan gaz quyish shoxobchalaridagi navbat bilan deyarli tenglashgan.

Xususiy benzin quyish shoxobchalarida esa bu narx 7200 so‘mni tashkil etmoqda. Ularda ham navbat bor, ammo “O‘zbekneftgaz” shoxobchalaridagi kabi kilometrga cho‘zilmagan. Shuningdek, “O‘zbekneftgaz” shoxobchalarida A-92 markali benzin 9500 so‘mdan, xususiy benzin quyish shoxobchalarida esa 10500 so‘mdan sotilmoqda. Bu markali benzinga deyarli navbat yo‘q, — deydi Azizbek Abduvaliyev.

Qashqadaryo

“Daryo” internet nashrining Qashqadaryo viloyatidagi vakili Murodjon Amirovning ma’lumot berishicha, “O‘zbekneftgaz”ning viloyatdagi mavjud 3 ta shoxobchasida AI-80 markali benzin 5700 so‘mdan sotilayotgan bo‘lsa, xususiy zapravkalarda aynan shu markadagi yonilg‘i hamon 7000 so‘mdan pullanmoqda.

Viloyatning Shahrisabz tumanida “Ishonch” firmasiga qarashli yonilg‘i shoxobchasida AI-80 markali benzin narxi 7000 so‘m ekani yozilgan. Shoxobcha sotuvchisiga bu markali benzin aksiz solig‘idan ozod qilingani uchun narxi tushgani aytilgach, narxni 5700 so‘mga tushirdi. Ammo doimiy shu narx saqlanib qolishi dargumon, — deydi muxbir.

Qo‘shimcha qilinishicha, AI-80 markali benzin viloyatning aksariyat tumanlarida haligacha eski narx — 6800-7000 so‘mgacha bo‘lgan narxda sotilmoqda.

Farg‘ona

Tahririyatning Farg‘ona viloyatidagi muxbiri Azizjon Ermatovning yozishicha, viloyat markazi Farg‘ona shahrida nafaqat “O‘zbekneftgaz”ga qarashli zapravkalarda, tadbirkorlarga qarashli benzin quyish shoxobchalarida ham AI-80 markali benzin 5700 so‘mdan sotilmoqda.

Tan olish kerak, ayrim zapravkalar yopiq. Zapravka egalari bu markali benzin yo‘q demoqda, — deydi muxbir.

Ta’kidlanishicha, viloyatdagi benzin quyish shoxobchalarida arzonlashtirilgan benzin 5700 so‘mdan 7000 so‘mgacha bo‘lgan narxda sotilmoqda.

Viloyat markazi Farg‘ona shahrida benzin taqchilligi kuzatilmayapti. Navbatlar deyarli yo‘q. Shaharda benzin narxlari 5700 so‘mdan 6600 so‘mgacha. Tumanlardagi narxlar esa 6800 so‘mdan 7000 so‘mgacha. Tumanlarda aynan AI-80 benzin yetishmovchiligi kuzatilyapti. Ayrim zapravkalar yopiq, ayrimlarida AI-80 yo‘q, o‘rniga AI-92 sotilyapti, — deydi Azizjon Ermatov.

“Daryo”ning Andijondagi muxbiri Umidjon Mamarasulovning ma’lumot berishicha, arzonlagan benzin sabab metan zapravkalardagi turnaqator navbat benzin zapravkalariga ko‘chgan.

Haydovchilardan biri Vasliddin Quvondiqovning aytishicha, u benzin zapravkada ikki soatdan buyon navbatda tursa-da, yonilg‘i ololmagan.

Ertalab soat to‘rtda uydan chiqqanman. Besh soat gaz zapravkada navbat kutdim. Navbatim kelay deganda o‘chirib qo‘yishdi. Shuncha turib gaz quyolmaganim bois, benzinga keldim. Bu yerda ham navbat paydo bo‘libdi. Ikki soatdan oshdi. Shu yerdagi arzonidan quyay deb kelsak, bu yerda ham odamning yuziga oyoq qo‘yadiganlar bor ekan. Yaxshiyam qonun posbonlari kelib yordam berib turibdi. Bo‘lmasa na benzin, na gaz ololamiz. Tirikchilik qilib bo‘lmay qolardi, — deydi u.

Viloyatdagi benzin quyish shoxobchalaridan biri mas’ulining aytishicha, bir kunda 8 ming litrdan ortiq AI-80 markali benzin sotilgan.

Bugun ham Andijondagi “Andijonneftbaza” MCHJga qarashli avtomobillarga yonilg‘i quyish shoxobchasi doimgidek o‘z faoliyatini davom ettiryapti. Tunu-kun bolalar xizmatda. Prezidentimiz chiqargan qaror bilan xalqqa yengillik yaratish maqsadida AI-80 benzini 5700 so‘m etib belgilandi. Kechqurun soat 00:00 dan ish boshlagan bo‘lsak, shu bo‘yi hozir ham savdo to‘xtagani yo‘q. Hozirgacha 8 ming litrdan ko‘p benzin sotildi, — deydi navbatchi operator Shuhrat Ohunov.

Andijon shahridagi “O‘zbekneftegaz”ga qarashli ikkita hamda “Andijonneftbaza” MCHJga qarashli avtomobillarga benzin quyish shoxobchalarida AI-80 markali benzin 5700 so‘mdan sotilayotgani bois AYQSHda 1 kilometrdan ortiq navbatlar yuzaga kelgan.

Qo‘shimcha qilinishicha, Osh—Toshkent yo‘lidagi mavjud xususiy zapravkalarda AI-80 markali benzin 6800 so‘mdan 7500 so‘mgacha sotilmoqda. Ularning ayrimlarida shu markali benzin mavjud emas.

Qoraqalpog‘iston

2022-yilning 13-dekabriga o‘tar kechasi AI-80 markali benzin narxi 5700 so‘mga tushgani xabar berilgach, Nukusdagi ba’zi shoxobchalarda AI-80 benzini tugab qoldi. Ba’zilarida esa bir necha kundan beri shu markadagi benzin sotilmayapti, deya xabar berdi “Daryo”ning Qoraqalpog‘istondagi muxbiri Shuhrat Saidahmadov.

Bugun tushlikka kelib Nukusdagi sanoqli shoxobchalarda AI-80 benzini topish mumkin bo‘lmoqda. Narx esa 7000 so‘mligicha qolgan. AI-91, 92 benzinlari esa 12000 mingga chiqqan, — deydi nashr muxbiri.

“Daryo” mazkur holat yuzasidan o‘rganishlarini davom ettiradi.