Якунланаётган ҳафта Сенат раиси Танзила Норбоеванинг уйига ўғри тушгани-ю, блогерликка даъвогар қизнинг Қашқадарё ҳокими бошчилигидаги вилоятни ёш блогерлар ёрдамида «паноҳига олмоқчи»лигини айтгани билан эсда қолмоқда. «Дарё» ҳафтанинг энг шов-шувли воқеалари кетма-кетлигини ёдга олади.
Тошкент шаҳрининг Мирзо Улуғбек туманидаги уйларнинг биридан 12 минг 500 доллар миқдоридаги пул ўғирлангани хабар берилди. Бу ҳақда жамоатчиликка маълум қилган Инсон ҳуқуқлари «Эзгулик» жамияти раиси Абдураҳмон Ташанов уй Сенат раиси Танзила Норбоеванинг қизига тегишли эканини билдирди.
«Дарё» манбалари берган ҳужжатда Сенат раиси хонадонига ўғриликка тушгани ва 12 минг 500 долларни ўғирлашда гумонланаётгани айтилган аёл ИИБ ходимлари унга куч ишлатиб, айбни бўйнига қўйганини ёзган.
Ҳужжатларда қайд этилишича, 37 ёшли гумонланувчи Д.Т. Мирзо Улуғбек туманида жойлашган, махсус қўриқловга олинган Дўрмон комплексидаги 22-уйда энага сифатида ишлаб келган. 2 ноябрдан 6 ноябргача бўлган навбатчилик вақтида уйдаги жавон ичидан уй бекасига тегишли 12 минг 500 долларни яширин равишда талон-торож қилганликда гумон қилинган. Ва 2022 йил 26 ноябрь куни гумонланувчи сифатида жиноят ишига жалб этилган. Гумонланувчига 2022 йилнинг 2 декабрь куни Мирзо Улуғбек тумани прокурори илтимосномаси билан Жиноят ишлари бўйича Мирзо Улуғбек тумани суди ажримига мувофиқ қамоққа олиш эҳтиёт чораси қўлланилган.
2022 йил 5 декабрь куни соат 6:00 ларда мени Дилмурод терговчи хонасига олиб борди. У ерда Мирзо Улуғбек туман ИИБ Жиноят қидирув бўлими ходими Бекзод келиб, Дилмуродни тергов бўлими ходими деб айтди. Дилмуроднинг хонаси тўртинчи қаватга олиб чиқди. У ерда менга аввал яхши гапиришди, кейин Бекзод менга бақирди ва чап оёғимни оёғи билан босди. Кейин менга жисмоний машқлар қилдирди ва жисмоний зарар етказди. Елкамга, қўлимга мушт қилиб урди. Кейин менга ҳозир кийимингни еч, расмга олиб эрингга жўнатаман, деб мажбурлади. Мен улардан бу ишни қилмаслигини сўрадим, — дейди унга куч ишлатилганидан шикоят қилган аёл.
Кейинчалик 12 минг 500 долларидан айрилгани айтилаётган жабрланувчи ариза берган кунининг эртасига яна ҳуқуқни муҳофаза қилувчи органга мурожаат қилиб, даъвоси йўқлигини билдириб, аризасини қайтариб олган. Ҳамда 12 минг 500 доллардан воз кечган. Гумонланувчи ўша куннинг ўзида қўйиб юборилган.
Мазкур ҳафтада шунингдек, электр энергия танқислиги ва табиий газ етишмовчилиги сабаб фаолияти деярли тўхтатилган метан газ заправкалари муаммоси ва ҳайдовчиларнинг бензинга бўлган талаби ҳукумат вакиллари, шунингдек шахсан президент Шавкат Мирзиёевни ҳам ташвишлантирди. Бунинг ортидан Аи-80 бензинига нисбатан акциз солиғини бекор қилиш ҳақида президентнинг махсус қарори ҳам қабул қилинди.
Натижада Аи-80 русумли автобензин маҳсулотининг чакана нархи амалдаги нархларга нисбатан ўртача 8,7 фоизга камайиши прогноз қилинди ва «Ўзбекнефтгаз»га қарашли барча шохобчаларда шу маркадаги бензин 5700 сўмдан сотила бошланди.
Бензиннинг арзонлашиши эса асосан водий вилоятларида, шунингдек Қашқадарё, Сурхондарё вилоятлари ҳамда Қорақалпоғистон республикасида АИ-80 маркали бензиннинг заправкалардан йўқолиб қолишига олиб келди. Табиийки, бу ҳолат ҳудудларда йўловчи ташувчи транспортларда йўлкира нархи икки бараварга ортишига олиб келди.
Давлат раҳбари раислигидаги навбатдаги селекторларнинг бирида Шавкат Мирзиёев Ўзбекистон ҳудудида муаммо бўлиб турган электр энергияси ва табиий газ тақчиллигидан хабардорлигини маълум қилди ва бу борада ишонилган масъуллар ишончни оқламагани сабаб халқ муаммоларга дуч келаётганини билдирди. Ва зарур чораларни кўрмагани учун 7 нафар раҳбарга ҳайфсан берди.
Куни кеча Учтепани айланиб, пастдаги аҳвол бўйича хулосаларимни қилдим. Ички кўчалар, уй-жойлар олди тозалигини ҳам сизларга президент айтиши керакми? — деди президент.
Ушбу ҳафтада табиий газ ва электр энергияси етишмовчилиги борасида шикоят қилаётганларга қамоқ ҳақида эслатиб, таҳдид қилгани айтилган наманганлик депутат «Дарё» мухбири билан суҳбатлашиб, қилмишига изоҳ берди.
Бундан 5 йил аввал, 2017 йили 10 ой давомида қамоқ эҳтиёт чорасида сақланганман. Суд тугаганидан сўнг озодликка чиққанман ва кейинчалик судланганлик ҳолати олиб ташланган. Шундан келиб чиқиб, ҳаётда электр ва газ танқислигидан ташқари бошқа ташвишлар ҳам борлиги, уларнинг олдида бу муаммолар у қадар аҳамиятли эмаслигини назарда тутиб, пост қўйгандим. Лекин барча ҳам мени танимаслиги, ўтмишимдан хабардор эмаслиги, бошқача тушунишлари мумкинлигини ўйлаб кўрмаган эканман, — деди у.
Мазкур ҳафтада шунингдек, Қарши давлат университетида таҳсил олувчи талаба қизнинг ёш блогерлар жамоасини тузиб, Муроджон Азимов бошчилигидаги вилоятни «паноҳига олмоқчи»лигини айтгани билан эсда қолди. Қашқадарё ҳокими билан мулоқотида талаба қиз вилоятда ёш талабалар иштирокида блогерлар жамоасини ташкил қилиб, танқидчи блогерларга муносиб жавоб бериш таклифини берди. Бунга жавобан вилоят ҳокими уни ҳокимликка ишга олишини билдирди. Кейинчалик бу ҳолатга муносабат билдирган ҳокимлик ахборот хизмати раҳбари Аҳрор Содиқовнинг талаб қизнинг гапи шунчаки таклиф эканини айтиб чиқди. «Дарё» мухбири билан суҳбатлашган талаб қиз эса жамоатчилик унинг фикрини нотўғри талқин қилаётганини айтди.
Мен бу гапларим — таклифим билан айнан кимнидир қоралаш ёки оқлашни айтмадим. Баъзи бир ҳолатларда воқеани бўрттириб гапириб, вилоятимиз шаънига ёмон гаплар айтаётган, бунга ҳуқуқи бор ёки йўқлигини билмай ҳолатга нотўғри ёндашаётган блогерлар воқеага ижобий ёндашиш ҳам керак деган маънода гапирдим, — деди блогерликка даъвогар қиз.
Ситора Жалилова шунингдек, жамоатчиликка мурожаат қилиб, «Ёш қиз олдинга бир қадам ташлаб юраман деса, унга бирдан тош отиш яхши эмас. Ҳокимимиз мендек оддий бир талаба қизга имкон бериб кўряпти. Бу ишончни муносиб оқлайман. Илтимос, бир-биримизни ҳурмат қилайлик», — деди.
Изоҳ (0)