Qashqadaryolik tadbirkor Nurbek Ergashev viloyatning Kasbi tumanidagi eng chekka hududlar — “G‘alaba”, “Mirzo Ulug‘bek”, “Talishbe” va “Temur Malik” aholisiga 4 ta tez tibbiy yordam avtomobillarini sovg‘a qildi. Bu haqda jamoatchilikka viloyat hokimi xabar bergan.
Ta’kidlanishicha, viloyat hokimi Murodjon Azimov ishtirokidagi tadbirda maxsus jihozlangan tez tibbiy yordam avtomobillari hududdagi tez yordam bo‘limlariga topshirilgan.
Saxovatli tadbirkorimiz Nurbek Ergashev prezidentimizning tadbirkorlarga yaratib berayotgan imkoniyatlarini his qilib, davlatimiz rahbarining chaqiriqlariga labbay deb javob berdi va Kasbi tumani aholisi uchun 4 ta zamonaviy jihozlangan maxsus tez tibbiy yordam avtomobillarini sovg‘a qildi. Tadbirkor bu avtomobillarni o‘z hisobidan 1 milliard 200 million so‘mga xarid qilib, xalqqa juda katta saxovatpeshalik qildi. Bugun shu avtomobillar tumanning to‘rtta hududidagi ahvoliga beminnat xizmat ko‘rsatadi. Buning uchun tadbirkorga Qashqadaryo xalqi, viloyat hokimligi va jamoatchilik nomidan minnatdorchiligimizni bildiramiz, — dedi viloyat hokimi Murodjon Azimov.Ma’lum bo‘lishicha, mazkur tadbirga tadbirkor bilan hamkorlikda ishlovchi fermerlar ham taklif etilgan bo‘lib, tadbirkor hamkor fermerlarni ham Yangi yil bayrami bilan qutlab, ularga sovg‘a-salom ulashgan.
Muhtaram prezidentimiz ko‘p marotaba tadbirkorga imkoniyat yaratib bersa, u xalqni boqishini, davlatga katta daromad keltirishlarini ta’kidlardi. Biz bugun shuni o‘zimizda, tumanimizda ko‘rdik va guvohi bo‘ldik. Tadbirkor Nurbek Ergashevga imkoniyat yaratib berilganidan so‘ng u tuman ahlidan yordamini ayamay, eng chekka va og‘ir ahvoldagi qishloq aholisi uchun o‘z hisobidan tez tibbiy yordam avtomobillarini topshirdi. Tadbirkor ta’sischiligidagi “Naxshab tex group” mas’uliyati cheklangan jamiyati Kasbi tumanida 3346 gektar yer maydonida 150 ta fermer xo‘jaliklari bilan fyuchers shartnomasi asosida 11,5 ming tonna hosil o‘rniga 15,4 ming tonna paxta xom ashyosini yetishtirilib, rejani ortig‘i bilan bajardi. Shaxsan hokim sifatida bundan xursandman va faoliyatim davomida barcha tadbirkorni qo‘llab-quvvatlashga tayyorman, — deydi Kasbi tumani hokimi To‘xtamurod Meyliyev.Tadbirkorga yaqin manbaning “Daryo” muxbiriga qo‘shimcha qilishicha, korxona yil yakunida yuqori mehnat unumdorligiga erishgan 24 nafar xodimlarining maroqli dam olishi uchun ularni Misr davlatining “Sharm ash-shayx” dam olish maskaniga yo‘llanma bilan taqdirlagan.
Ma’lum bo‘lishicha, “Sulton tex group” mas’uliyati cheklangan jamiyati 2011-yilda tashkil etilgan bo‘lib, 2018-yildan boshlab to‘qimachilik sanoati mahsulotlari ishlab chiqarish boshlangan. Korxona tomonidan paxta xom-ashyosini yetishtirishdan boshlab, uni chuqur qayta ishlash orqali tayyor mahsulot ishlab chiqarishgacha bo‘lgan barcha jarayonlarni qamrab olgan o‘zaro bir-biriga bog‘liq, 87,3 million dollar qiymatidagi 3945 ish o‘rinli 15 ta yirik loyihalar amalga oshirilmoqda.
Bugungi kunga qadar 59,8 million dollar miqdoridagi 11 ta loyiha amalga oshirilgan bo‘lib, 2745 ta ish o‘rinlari yaratilgan. 2023—2025-yillar davomida 27,5 million dollar miqdoridagi yana 4 ta loyiha ishga tushirilib, 1200 ta ish o‘rinlari yaratiladi. Korxona tomonidan joriy yilning 11 oyi davomida 34 million dollar miqdorida eksport amalga oshirilib, yil yakuniga qadar 40 million dollariga yetkaziladi. 2023-yilda eksport hajmi 100 million dollariga yetkazilishi rejalashtirilgan, — deydi korxona mas’uli.Tadbirkorga yaqin manbaning qo‘shimcha qilishicha, korxona mas’ullari kelajakda viloyatda onalar va bolalar salomatligini qo‘llab-quvvatlash uchun 200 o‘rinli zamonaviy Perinatal markazini ham qurib, viloyat ahliga xayriya qilishni niyat qilgan.
Izoh (0)