Eron hukumati mamlakatdagi tartibsizliklarda ishtirok etgan ikki o‘smirni o‘limga hukm qilishi mumkin. Bu haqda Bild xabar berdi.
Ma’lum qilinishicha, sud 17 yoshli Soniya Sharifiyga hukm chiqargan. Hibsga olingan namoyishchilarning aksariyati singari u ham mahalliy hokimiyat tomonidan “Xudoga qarshi urush olib borishda” ayblanmoqda. Politsiya qizning “Molotov kokteyli tayyorlayotgani” va “graffiti yozayotgani”ni ko‘rgan. Endilikda Soniyaga o‘lim jazosi berilishi kutilmoqda.
Qiz noyabr oyida Abdanan shahrida, buvisining uyida hibsga olingan. Hukm e’lon qilinishidan oldin u deyarli bir oyni qamoqda o‘tkazgan. Huquq himoyachilariga ko‘ra, Soniya hibsda qattiq kaltaklangan.
15 yoshli Amir Husayn Rahimiy ismli bola esa oktyabr oyidan beri hibsda. Namoyishni tarqatish chog‘ida o‘smir politsiya tomonidan yaralangan, biroq uning jarohatidagi o‘q haligacha olib tashlanmagan.
Bolaning onasi Amir qamoqxonada qiynoqqa solinayotganini aytmoqda. Uning ozod etilishi uchun Eron hukumati qariyb 11,5 ming yevro miqdorida garov puli belgilagan, biroq oilada bu miqdorni yig‘ish imkoniyati yo‘q.
Erondagi namoyishlar
Eronda 17-sentabrdan beri davom etayotgan namoyishlarda 400 000 ga yaqin odam hibsga olindi. Sentabr oyining oxirida Eronda 22 yoshli Mahsa Amini hijobni “noto‘g‘ri” o‘ragani uchun axloq politsiyasi tomonidan hibsga olinganidan keyin vafot etishi ortidan norozilik namoyishlari boshlandi. Ular butun mamlakat bo‘ylab haligacha davom etmoqda. Namoyishlar kuch tuzilmalari tomonidan shafqatsizlik bilan bostirilmoqda.
Tartibsizliklar oqibatida, Eron Milliy xavfsizlik kengashi ma’lumotlariga ko‘ra, allaqachon 200 dan ortiq odam halok bo‘lgan. Islom inqilobi posbonlari qo‘mondoni Serdar Gajizoda 300 nafar qurbon haqida, Iran Human Rights huquqni himoya qilish tashkiloti esa 448 nafar qurbon haqida ma’lum qilgan.
Eron oliy yetakchisi Ali Homayniy avvalroq namoyishlar AQSH va Isroil tomonidan rejalashtirilganini aytgandi. Amerika prezidenti esa noyabrda Vashington “Eronni ozod qilishi” haqida gapirgandi. Bunga javoban, Raisiy Eron 43 yil avval — 1979-yilgi Islom inqilobi chog‘ida ozod etilganini ta’kidlagan.
Mavzuga doir:
Izoh (0)