Qozog‘istonda askarlar xizmat muddati davomida kredit to‘lashdan ozod qilindi

Qozog‘iston Mudofaa vazirligi hamda Moliya bozorini tartibga solish va rivojlantirish agentligi o‘rtasida askarlarga kredit ta’tillari berish to‘g‘risida memorandum imzolandi. Bu haqda “Zakon.kz” xabar berdi.

Harbiy xizmat davomida barcha bank va mikromoliya tashkilotlaridan naqd pul kreditlari olgan harbiylarning kredit to‘lash zarurati muzlatiladi. Buning uchun Mudofaa vaziri va moliya tashkilotlari bilan o‘zaro hamkorlikning maxsus algoritmi ishlab chiqilgan.

“Chaqiruv kampaniyasi davomida askarlarining bank krediti va mikrokreditlari bo‘yicha to‘plangan ma’lumotlar zudlik bilan Moliya bozorini tartibga solish va rivojlantirish agentligiga yuboriladi. Ushbu ma’lumotlar asosida kreditorlar asosiy qarz bo‘yicha to‘lovlarni kechiktirish, to‘lash va qarzni undirishning barcha shakllarini to‘xtatib turish masalalarini ishlab chiqadi”, deyiladi Mudofaa vazirligi bayonotida.

To‘lovlarni kechiktirish davrida muddatli harbiy xizmatchilarga nisbatan kreditorlar tomonidan da’volar qo‘zg‘atilmaydi, qarzni undirish to‘g‘risida notariusga murojaat qilinmaydi. Shuningdek, kredit to‘lovchining uyi sotilmaydi, uning oilasi chiqarib yuborilishiga yo‘l qo‘yilmaydi. Bundan tashqari, sud qarori bilan aniqlangan har qanday qarzni undirish to'xtatiladi.

Mudofaa vazirligida ta’kidlashicha, umuman olganda, bunday yechim muhim ikkita vazifaga qaratilgan. Birinchisi, moliyaviy xizmat iste’molchilarining qonuniy manfaatlarini himoya qilish. Ikkinchisi harbiy xizmatni o‘tash paytida askarlarning kredit va mikrokreditlarni to‘lay olmasligi bilan bog‘liq ijtimoiy keskinlikni bartaraf etishdir.