Эрон ҳукумати мамлакатдаги тартибсизликларда иштирок этган икки ўсмирни ўлимга ҳукм қилиши мумкин. Бу ҳақда Bild хабар берди.
Маълум қилинишича, суд 17 ёшли Сония Шарифийга ҳукм чиқарган. Ҳибсга олинган намойишчиларнинг аксарияти сингари у ҳам маҳаллий ҳокимият томонидан «Худога қарши уруш олиб боришда» айбланмоқда. Полиция қизнинг «Молотов коктейли тайёрлаётгани» ва «граффити ёзаётгани»ни кўрган. Эндиликда Сонияга ўлим жазоси берилиши кутилмоқда.
Қиз ноябрь ойида Абданан шаҳрида, бувисининг уйида ҳибсга олинган. Ҳукм эълон қилинишидан олдин у деярли бир ойни қамоқда ўтказган. Ҳуқуқ ҳимоячиларига кўра, Сония ҳибсда қаттиқ калтакланган.
15 ёшли Амир Ҳусайн Раҳимий исмли бола эса октябр ойидан бери ҳибсда. Намойишни тарқатиш чоғида ўсмир полиция томонидан яраланган, бироқ унинг жароҳатидаги ўқ ҳалигача олиб ташланмаган.
Боланинг онаси Амир қамоқхонада қийноққа солинаётганини айтмоқда. Унинг озод этилиши учун Эрон ҳукумати қарийб 11,5 минг евро миқдорида гаров пули белгилаган, бироқ оилада бу миқдорни йиғиш имконияти йўқ.
Эрондаги намойишлар
Эронда 17 сентябрдан бери давом этаётган намойишларда 400 000 га яқин одам ҳибсга олинди. Сентябрь ойининг охирида Эронда 22 ёшли Маҳса Амини ҳижобни «нотўғри» ўрагани учун ахлоқ полицияси томонидан ҳибсга олинганидан кейин вафот этиши ортидан норозилик намойишлари бошланди. Улар бутун мамлакат бўйлаб ҳалигача давом этмоқда. Намойишлар куч тузилмалари томонидан шафқатсизлик билан бостирилмоқда.
Тартибсизликлар оқибатида, Эрон Миллий хавфсизлик кенгаши маълумотларига кўра, аллақачон 200 дан ортиқ одам ҳалок бўлган. Ислом инқилоби посбонлари қўмондони Сердар Гажизода 300 нафар қурбон ҳақида, Iran Human Rights ҳуқуқни ҳимоя қилиш ташкилоти эса 448 нафар қурбон ҳақида маълум қилган.
Эрон олий етакчиси Али Ҳомайний аввалроқ намойишлар АҚШ ва Исроил томонидан режалаштирилганини айтганди. Америка президенти эса ноябрда Вашингтон «Эронни озод қилиши» ҳақида гапирганди. Бунга жавобан, Раисий Эрон 43 йил аввал — 1979 йилги Ислом инқилоби чоғида озод этилганини таъкидлаган.
Мавзуга доир:
Изоҳ (0)