Япония АҚШда ишлаб чиқарилган Tomahawk ракеталаридан 500 тача сотиб олмоқда. Бу ҳақда Washington Post газетаси америкалик ва япониялик расмийларга таяниб ёзди. Токионинг ҳаракатлари Иккинчи жаҳон уруши тугаганидан бери энг йирик қуролланиш деб аталди.
Токио ракеталарни миллий хавфсизлик ва мудофаа стратегиясини кўриб чиқиш доирасида сотиб олмоқда. Шу билан бирга, мамлакат ҳукумати мудофаа бюджетини сезиларли даражада — ЯИМнинг 2 фоизигача оширади.
Юзлаб Tomahawk сотиб олиш билан Япония Хитой ва Шимолий Кореяга ҳарбий сигнал юбормоқда, ҳамда Хитойнинг Тайванга бостириб кириши эҳтимоли жиддий эканини билдирмоқда. Агар бу давлатлар Японияга қарши таҳдидлар билан чекланмаса, Tomahawk’нинг учиш масофаси ракеталарга Хитой материги ёки Шимолий Корея ҳудудига етиб бориш имконини беради, деб қайд этди нашр.
Япон элитаси ва жамияти Украинада уруш бошланганидан кейин қуролланиш қарорида янада мустаҳкамланди. Парвоз масофаси 1600 километргача бўлган Tomahawk ракеталари Россиянинг Узоқ Шарқига, мамлакат шимолида ўрнатилган ракеталар эса Шарқий Сибирга етиб бориши мумкин.
Tomahawk Япония учун якуний ечим бўлмайди. Токио 10 йил ичида илк бор ўзининг «Тип 12» қанотли ракеталарини олмоқда.
Байден маъмурияти Япониянинг қайта қуролланишини қўллаб-қувватлади. «Қўшма Штатлар шунчаки бир томонлама қадамлар қўймасдан, иттифоқчилар ва ҳамкорларни катта ўзгаришларга олиб келадиган ва минтақадаги имкониятларимизни оширадиган йўллар билан кучайтиришга интилмоқда», — деди америкалик расмий The Washington Post газетасига. Бунгача АҚШ Tomahawk’ларни фақат Буюк Британияга сотган.
Изоҳ (0)