Niderlandiya tashqi ishlar vaziri Vopke Xukstra Rossiyaning Ukrainadagi harakatlarini tekshirish uchun mamlakatda maxsus tribunal o‘tkazishga tayyorligini ma’lum qildi. Bu haqda Niderlandiya radioeshittirish korporatsiyasi (NOS) ma’lum qildi.
“Agar tribunal yaratish zarurati bor bo‘lsa, uni Gaagada ochish mumkin”, — dedi TIV rahbari.
Uning so‘zlariga ko‘ra, Niderlandiya Yevropa Ittifoqi bilan birgalikda ushbu tribunal uchun xalqaro hamjamiyatdan siyosiy va moliyaviy yordam so‘raydi. Xukstraning fikricha, yangi sud mart oyidan beri Ukrainada urush jinoyatlari va insoniyatga qarshi jinoyatlarni tergov qilayotgan Gaaga xalqaro jinoyat sudi ishiga xalal bermasligi kerak.
NOS qayd etganidek, tribunalni yaratish uchun BMT Xavfsizlik kengashining qarori talab qilinadi, bunda Rossiya doimiy a’zo sifatida veto qo‘yish huquqiga ega.
Noyabr oyi oxirida Yevrokomissiya rahbari Ursula fon der Lyayen BMT ko‘magida Rossiyaning Ukrainadagi harakatlarini tergov qilish va jinoiy javobgarlikka tortish uchun ixtisoslashtirilgan sud yaratish zarurligini ma’lum qilgandi. Uning aytishicha, Rossiya Ukrainaga yetkazilgan moliyaviy zararni ham qoplashi kerak, uning hisob-kitoblariga ko‘ra, bu hozirgacha 600 milliard yevrodan oshgan.
O‘sha kuni Fransiya Tashqi ishlar vazirligi Bryussel va Kiyev bilan birgalikda Rossiyaning Ukrainaga qarshi bosqinchilik jinoyati bo‘yicha Maxsus tribunal yaratish ustida ish boshlanganini e’lon qildi.
Izoh (0)