Eron mudofaa vaziri Muhammad-Rizo Ashtianiy Kiyev urush paytida Eron qurollaridan foydalanilayotgani haqida birorta dalil keltirmaganini da’vo qildi. Rossiyaning Eronda ishlab chiqarilgan dronlar bilan Ukrainaga zarba yo‘llayotgani haqida bir necha oydan buyon g‘arb matbuoti va rasmiylari xabar bermoqda.
Eron Mudofaa vazirligi rahbarining aytishicha, Ukraina va Eron harbiylari o‘rtasida uchrashuv bo‘lib o‘tgan, unda Ukraina tomoni Eronning Rossiyaga dronlar yetkazib berayotgani, ulardan Ukraina shaharlariga hujumda foydalanilayotganini tasdiqlovchi hech qanday hujjat taqdim etmagan.
Muhammad-Rizo Ashtianiy Eron va Rossiya mudofaa sohasidagi hamkorlikni rivojlantirayotganini tan oldi, biroq bu Ukrainadagi urushda foydalanish uchun dronlar yetkazib berishni o‘z ichiga olmasligini ta’kidladi.
Avgust oyida The Washington Post gazetasi Rossiyaga Eron dronlari yetkazib berilayotgani haqida yozgandi. Bungacha, iyul oyida AQSH ma’muriyati Tehronning Moskvaga bir necha yuzlab uchuvchisiz uchoqlarni, jumladan, qurol olib yurishga qodir dronlarni topshirish rejalari haqida ma’lumotga ega ekanini bildirgan.
Ma’lumotlarga ko‘ra, Rossiya Ukrainadagi urushda Eronda ishlab chiqarilgan Shahed-131 va Shahed-136 dronlaridan foydalanmoqda, Rossiya Qurolli kuchlari ularning nomini “Geran-1” va “Geran-2” deb o‘zgartirib olgan. Rossiya rasmiylari dronlarning Erondan olib kelinishini tan olmayapti.
Noyabr oyi boshida Eron tashqi ishlar vaziri Husayn Abdullohian Rossiyaga bir qancha dronlar yuborilganini tasdiqlab, bu urush boshlanishidan bir necha oy oldin sodir bo‘lganini aytdi.
12-dekabr kuni Amerikaning Urushni tadqiq qilish instituti (ISW) o‘zining kunlik sharhida yozishicha, Rossiya qo‘shinlari Ukraina hududiga zarbalar berishda Eron dronlaridan faolroq foydalana boshlagan. ISW fikricha, Rossiya harbiylari, katta ehtimol bilan, Erondan dronlarning yangi partiyasini olgan yoki yaqin kunlarda ularning yetkazib berilishi kutilmoqda.
Izoh (0)