Qisman tan olingan Kosovo respublikasi 15-dekabr kuni Yevroittifoqqa qo‘shilish uchun ariza bermoqchi. Bu haqda Radio Television of Kosovo mahalliy telekanali tegishli hujjat bilan tanishib chiqib, xabar berdi.
Telekanal xabariga ko‘ra, ariza 2022-yil noyabrida yozilgan. Unda ta’kidlanishicha, Yevroittifoqqa a’zo bo‘lish Kosovo uchun strategik maqsad hisoblanadi va buni mamlakat aholisining 90 foizdan ortig‘i qo‘llab-quvvatlaydi.
“Bu qadam fuqarolarimizning kuchli irodasini namoyish qiladi va Kosovo institutlari Yevroatlantika yo‘liga qat’iy sodiqligini yaqqol ko‘rsatadi”, — deyiladi hujjatda.
RTK qayd etishicha, Kosovoning Yevroittifoqqa qo‘shilish istiqbollari noaniq bo‘lib qolmoqda, chunki beshta mamlakat, ya’ni Ispaniya, Kipr, Gretsiya, Slovakiya va Ruminiya mamlakat mustaqilligini tan olganicha yo‘q. Shunga qaramay, Kosovo hukumati aminki, mamlakat 2015-yil 27-oktabrdagi Barqarorlashish va uyushish haqidagi bitimda ko‘zda tutilgan majburiyatlarini bajargan, shu sababli Kosovo va Yevroittifoqning yaqinlashuvi bo‘yicha keyingi qadamlarni Yevroittifoqning o‘zi belgilashi kerak.
Avvalroq Kosovoning Yevroittifoqqa kirish uchun ariza berish niyati haqida mamlakat bosh vazirining birinchi o‘rinbosari, Yevropa bilan integratsiyalashuv uchun javobgar bo‘lgan Besnik Bislimi ma’lum qilgan edi. Uning so‘zlariga ko‘ra, Kosovo 2030-yilgacha Yevroittifoqqa qo‘shilishi mumkin. Shuningdek, uning qo‘shimcha qilishicha, bu paytgacha Kosovo uning mustaqilligini tan olishdan bosh tortgan mamlakatlar bilan barcha bahslarni hal qilishga erishadi.
2003-yilda Yevroittifoq G‘arbiy Bolqon mamlakatlariga YIga a’zolikni taklif qilib, buning evaziga ushbu mamlakatlarda Yevropa me’yorlari bo‘yicha siyosiy va iqtisodiy islohotlar o‘tkazilishini talab etishga qaror qilgan edi. Ushbu mamlakatlar orasida Ittifoqqa a’zo bo‘la olgan birinchi va hozircha yagonasi Xorvatiya bo‘ldi, u 2013-yilda qabul qilingan edi.
Kosovo esa G‘arbiy Bolqon davlatlari ichida Yevroittifoqqa kirish uchun ariza bermagan so‘nggi mamlakat bo‘lib qolmoqda.
Kosovo Barqarorlashish va uyushish haqidagi bitimga muvofiq, Yevroittifoqda amal qiluvchi stadartlar va huquqiy me’yorlarga muvofiq islohotlar o‘tkazish majburiyatini olgan edi.
Izoh (0)