Fransiya prezidenti Emmanuel Makronning Ukrainadagi urushdan keyin Rossiyaga xavfsizlik kafolatlarini berish haqidagi bayonotidan so‘ng Boltiqbo‘yi mamlakatlari va Yevropa Ittifoqining boshqa davlatlari rasmiy norozilik e’lon qildi. Bu haqda Reuters xabar berdi.
Reuters ma’lumotlariga ko‘ra, Latviya, Litva, Estoniya, Slovakiya va Polsha rasman Parij pozitsiyasiga qarshi chiqqan.
Ushbu demarshga qancha davlat qo‘shilgani noma’lum, deb ta’kidlaydi Reuters. Fransiya, Chexiya va Slovakiya tashqi ishlar vazirliklari agentlik so‘rovlariga javob bermagan, Polsha tashqi ishlar vazirligi esa izoh berishdan bosh tortgan.
Hujjat loyihasi Chexiya respublikasi vakillari tomonidan o‘tgan hafta Yevropa Ittifoqining boshqa mamlakatlari poytaxtlariga topshirilgan. Reuters xabariga ko‘ra, unda Rossiya bilan Yevropa xavfsizligi masalalari bo‘yicha muzokaralar g‘oyasi tanqid qilingan.
Dekabr oyi boshida Makron Ukrainadagi urush tugaganidan so‘ng Yevropa yangilangan xavfsizlik arxitekturasini qurishi kerakligini, bu jumladan, Rossiya uchun kafolatlar berishni ham o‘z ichiga olishini aytgandi.
“Biz ertangi xavfsizlik arxitekturasi haqida o‘ylashimiz kerak. Gap, xususan, Rossiya prezidenti Vladimir Putinning NATO Rossiya chegaralariga yaqinlashayotgani haqidagi so‘zlari to‘g‘risida ketmoqda. Biz Ukrainadagi urushdan keyin nima bo‘lishiga tayyorgarlik ko‘rish va ittifoqchilarimizni qanday himoya qilish, shu bilan birga Rossiya muzokaralar stoliga qaytgan paytda uning xavfsizligi uchun kafolatlar berish haqida o‘ylashimiz kerak”, — degan Makron.
Ayni paytda G7 sammiti ishtirokchilari 12-dekabr kungi yig‘ilish yakunlari bo‘yicha bayonot berib, Rossiya prezidenti Ukrainaga bostirib kirgani uchun javobgarlikka tortilishi kerakligini, Rossiya esa urush oqibatida yetkazilgan zararni to‘lashini ta’kidladi.
Izoh (0)