Belarus prezidenti Aleksandr Lukashenko tashqi ishlar vazirining birinchi o‘rinbosari Sergey Aleynikni Belarus TIV rahbari etib tayinladi. Bu haqda “BelTA” xabar berdi.
“Sergey Aleynik Belarus tashqi ishlar vaziri etib tayinlandi, u shu paytgacha TIVda vazirning birinchi o‘rinbosari lavozimida ishlab kelgan”, — deyiladi xabarda.
Bungacha mazkur lavozimda Vladimir Makey faoliyat olib borgan. Siyosatchi 26-noyabr kuni to‘satdan vafot etgan.
Belarus Tashqi ishlar vazirligining yangi rahbari haqida nimalar ma’lum?
Sergey Aleynik Minsk davlat chet tillar pedagogika instituti va Avstriya Tashqi ishlar vazirligi qoshidagi Diplomatik akademiyada tahsil olgan. U 1992-yildan buyon Tashqi ishlar vazirligida ishlagan, barcha mansab bosqichlarini bosib o‘tgan. 2022-yilning 14-fevralidan boshlab vazirning birinchi o‘rinbosari lavozimida faoliyat yuritgan. Favqulodda va muxtor elchi diplomatik unvoniga ega.
Vladimir Makeyning sirli o‘limi
26-noyabr kuni 64 yoshida Belarus tashqi ishlar vaziri Vladimir Makey vafot etdi. Mahalliy OAV diplomatning o‘limiga yurak xuruji sabab bo‘lgani va amaldor o‘z ahvolini jiddiy qabul qilmaganini ta’kidladi.
Ukraina Ichki ishlar vazirligi maslahatchisi Anton Gerashchenkoning aytishicha, bu holat Lukashenko uchun signal bo‘lishi kerak.
“U zaharlangan bo‘lishi mumkinligi haqida mish-mishlar bor. Makey Lukashenkoning vorisi deb atalgan. U Rossiya ta’sirida bo‘lmagan kam sonlilardan biri edi. Aytishlaricha, bu Lukashenkoga ishora bo‘lishi mumkin”, — degan u.
Ukraina sobiq tashqi ishlar vaziri ham Makey o‘ldirib ketilgan bo‘lishi mumkinligini aytmoqda.
“Menimcha, Makey o‘ldirilgani ehtimoli juda yuqori. Albatta, yurak xuruji dorilarini rag‘batlantiradigan tegishli moddalar mavjud. Bu tasodifiy emas, Makey sog‘lig‘iga qanday g‘amxo‘rlik qilgani, o‘zining pozitsiyasini qadrlaganini bilaman. Menimcha, unda kun kelib Lukashenko o‘rnini egallash orzusi bo‘lgan. So‘nggi yillarda bu orzular saqlanib qolganmi yoki yo‘qligini aytish qiyin”, — deydi Klimkin.
Ukraina sobiq tashqi ishlar vazirining ta’kidlashicha, Makey “faqat yurak xurujidan” o‘lmagan bo‘lishi mumkin.
Izoh (0)