Vladimir Putinning an’anaviy matbuot anjumani, katta ehtimol bilan, Ukrainadagi urushning “o‘zboshimchalik bilan muhokama qilinishi”ga yo‘l qo‘ymaslik maqsadida bekor qilingan. Bu haqda Buyuk Britaniya Mudofaa vazirligi harbiy razvedkasi ma’lumotida aytiladi.
12-dekabr kuni Rossiya prezidenti matbuot kotibi Dmitriy Peskov 2022-yilda Putinning jurnalistlar bilan yakuniy matbuot anjumani o‘tkazilmasligini e’lon qildi. Bunday voqea o‘n yil ichida birinchi marta sodir bo‘lishidir. Tadbir bekor qilinishi sabablarini Kreml keltirib o‘tmadi.
Buyuk Britaniya Mudofaa vazirligi qayd etishicha, yakuniy matbuot anjumani doim Rossiya prezidenti jamoatchilik tadbirlari taqvimining muhim qismi bo‘lib kelgan va undan “Putinning ehtimoliy halolligini namoyish qilish imkoniyati” sifatida foydalanilgan.
“Savollar oldindan tekshirilishi deyarli aniq bo‘lsa-da, anjumanning bekor qilinishi, katta ehtimol bilan, Rossiyada urushga qarshi kayfiyat keng tarqalayotgani borasidagi xavotirlar bilan bog‘liqdir.
Kreml mansabdorlari Putin ishtirok etadigan har qanday tadbir ‘maxsus harbiy operatsiya’ning o‘zboshimchalik bilan muhokama qilinishiga aylanib ketishi ehtimoliga ortiq darajada kuyinadi”, — deyiladi xabarda.
2022-yilda Putin rossiyaliklar bilan an’anaviy “to‘g‘ridan to‘g‘ri efir”ni ham o‘tkazgani yo‘q va Federal kengashga murojaat bilan ham chiqqani yo‘q. “RIA Novosti”ning Davlat dumasidagi manbasi ma’lum qilishicha, murojaat 27-dekabr kuni e’lon qilinishi mumkin.
Vladimir Putin katta matbuot anjumanlarini 2001-yildan o‘tkazib keladi, 2012-yildan ular dekabr oyida tashkil qilina boshlagan. Shu paytgacha faqat 2005-yilda prezident an’anaviy matbuot anjumanini o‘tkazmagan. Shuningdek, 2009-yildan 2011-yilgacha, Putin Rossiya bosh vaziri lavozimini egallagan davrda ham bu tadbir tashkil qilinmagan.
Avvalroq Vladimir Putinning yillik katta matbuot anjumani 2022-yilda bo‘lib o‘tmasligi mumkinligi, hozircha uni yil oxirigacha o‘tkazish to‘g‘risida yakuniy qarorga kelinmagani ma’lum bo‘lgandi. “RBK” manbalari yakuniy qaror qabul qilishda “boshqa narsalar qatori maxsus harbiy operatsiya zonasidagi vaziyat ham hisobga olinishini” ta’kidlagandi. Shuningdek, prezidentning Federal Majlisga murojaati qachon bo‘lib o‘tishi aniq emasdi, bunga tayyorgarlik, Peskov avvalroq aytganidek, allaqachon boshlangan.
Izoh (0)