Беларусь президенти Александр Лукашенко ташқи ишлар вазирининг биринчи ўринбосари Сергей Алейникни Беларусь ТИВ раҳбари этиб тайинлади. Бу ҳақда «БелТА» хабар берди.
«Сергей Алейник Беларусь ташқи ишлар вазири этиб тайинланди, у шу пайтгача ТИВда вазирнинг биринчи ўринбосари лавозимида ишлаб келган», — дейилади хабарда.
Бунгача мазкур лавозимда Владимир Макей фаолият олиб борган. Сиёсатчи 26 ноябрь куни тўсатдан вафот этган.
Беларусь Ташқи ишлар вазирлигининг янги раҳбари ҳақида нималар маълум?
Сергей Алейник Минск давлат чет тиллар педагогика институти ва Австрия Ташқи ишлар вазирлиги қошидаги Дипломатик академияда таҳсил олган. У 1992 йилдан буён Ташқи ишлар вазирлигида ишлаган, барча мансаб босқичларини босиб ўтган. 2022 йилнинг 14 февралидан бошлаб вазирнинг биринчи ўринбосари лавозимида фаолият юритган. Фавқулодда ва мухтор элчи дипломатик унвонига эга.
Владимир Макейнинг сирли ўлими
26 ноябрь куни 64 ёшида Беларусь ташқи ишлар вазири Владимир Макей вафот этди. Маҳаллий ОАВ дипломатнинг ўлимига юрак хуружи сабаб бўлгани ва амалдор ўз аҳволини жиддий қабул қилмаганини таъкидлади.
Украина Ички ишлар вазирлиги маслаҳатчиси Антон Герашченконинг айтишича, бу ҳолат Лукашенко учун сигнал бўлиши керак.
«У заҳарланган бўлиши мумкинлиги ҳақида миш-мишлар бор. Макей Лукашенконинг вориси деб аталган. У Россия таъсирида бўлмаган кам сонлилардан бири эди. Айтишларича, бу Лукашенкога ишора бўлиши мумкин», — деган у.
Украина собиқ ташқи ишлар вазири ҳам Макей ўлдириб кетилган бўлиши мумкинлигини айтмоқда.
«Менимча, Макей ўлдирилгани эҳтимоли жуда юқори. Албатта, юрак хуружи дориларини рағбатлантирадиган тегишли моддалар мавжуд. Бу тасодифий эмас, Макей соғлиғига қандай ғамхўрлик қилгани, ўзининг позициясини қадрлаганини биламан. Менимча, унда кун келиб Лукашенко ўрнини эгаллаш орзуси бўлган. Сўнгги йилларда бу орзулар сақланиб қолганми ёки йўқлигини айтиш қийин», — дейди Климкин.
Украина собиқ ташқи ишлар вазирининг таъкидлашича, Макей «фақат юрак хуружидан» ўлмаган бўлиши мумкин.
Изоҳ (0)