“Daryo” nashri 13-dekabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Yaponiya Ikkinchi jahon urushidan keyin ilk bor eng yirik qurollanish holatida
Yaponiya AQSHda ishlab chiqarilgan Tomahawk raketalaridan 500 ta atrofida sotib olmoqda. Bu haqda Washington Post gazetasi amerikalik va yaponiyalik rasmiylarga tayanib yozdi.
Tokioning harakatlari Ikkinchi jahon urushi tugaganidan beri eng yirik qurollanish deb ataldi.Tokio raketalarni milliy xavfsizlik va mudofaa strategiyasini ko‘rib chiqish doirasida sotib olmoqda. Shu bilan birga, mamlakat hukumati mudofaa budjetini sezilarli darajada — YIMning 2 foizigacha oshiradi.
Yuzlab Tomahawk sotib olish bilan Yaponiya Xitoy va Shimoliy Koreyaga harbiy signal yubormoqda, hamda Xitoyning Tayvanga bostirib kirishi ehtimoli jiddiy ekanini bildirmoqda. Agar bu davlatlar Yaponiyaga qarshi tahdidlar bilan cheklanmasa, Tomahawk’ning uchish masofasi raketalarga Xitoy materigi yoki Shimoliy Koreya hududiga yetib borish imkonini beradi, deb qayd etdi nashr.
Yapon elitasi va jamiyati Ukrainada urush boshlanganidan keyin qurollanish qarorida yanada mustahkamlandi. Parvoz masofasi 1600 kilometrgacha bo‘lgan Tomahawk raketalari Rossiyaning Uzoq Sharqiga, mamlakat shimolida o‘rnatilgan raketalar esa Sharqiy Sibirga yetib borishi mumkin. Tomahawk Yaponiya uchun yakuniy yechim bo‘lmaydi. Tokio 10 yil ichida ilk bor o‘zining “Tip 12” qanotli raketalarini olmoqda.
Katta yettilik sammiti yakunlandi. Vladimir Zelenskiyning Ukrainada tinchlik o‘rnatilishini tezlashtirish taklifi va bunga Rossiyaning munosabati
“Katta yettilik” mamlakatlari sammiti ishtirokchilari 12-dekabr kungi sammit yakunida bayonot qabul qilib, Rossiya prezidentining Ukrainaga bostirib kirgani uchun javobgarlikka tortilishiga, Rossiya esa yetkazilgan harbiy zarar uchun tovon to‘lashiga erishishlarini ma’lum qildi.
“Katta yettilik” mamlakatlari bu yo‘nalishda aynan qanday choralarni ko‘rmoqchi ekaniga bayonotda aniqlik kiritilmagan.
G7 davlatlari, shuningdek, zarurat mavjud bo‘lar ekan, Ukrainani har tomonlama qo‘llab-quvvatlashini yana bir marta ma’lum qildi va urush tugatilishi kerakligini — Rossiya o‘t ochishni to‘xtatib, butun Ukraina hududidan o‘z qo‘shinlarini olib ketishi kerakligini ta’kidladi.
Ushbu sammitda Ukraina prezidenti Vladimir Zelenskiy ham qatnashdi va G7 mamlakatlari yetakchilariga murojaatida “Ukrainada tinchlik o‘rnatilishini tezlashtirish” bo‘yicha o‘z rejasini taklif qildi. U Kiyevga yangi turdagi qurol-yarog‘ yetkazib berishni, energetik va moliyaviy ko‘makni hamda Ukraina tomonidan ilgari surilgan 10 bandli “tinchlik formulasi”dan iborat bo‘lgan “yangi diplomatiya”ni o‘z ichiga oladi.
G7 mamlakatlari sammit yakunida Kiyevga moliyaviy ko‘makni muvofiqlashtirish uchun xalqaro platforma yaratishga qaror qildi. Ayni vaziyatda Rossiya prezidenti matbuot kotibi Dmitriy Peskov Ukrainadan Rossiya qo‘shinlarining olib chiqib ketilishi haqida gap ham bo'lishi mumkin emasligini ta’kidlagan va Zelenskiyning Ukrainada tinchlik o‘rnatish bo‘yicha taklif qilgan uchta qadamni “harbiy harakatlarni davom ettirish uchun uch qadam” deb atagan.
Boltiqbo‘yi va qator Yevropa davlatlari urushdan keyin Rossiyaga xavfsizlik kafolatlari berishga norozilik e’lon qildi
Fransiya prezidenti Emmanuel Makronning Ukrainadagi urushdan keyin Rossiyaga xavfsizlik kafolatlarini berish haqidagi bayonotidan so‘ng Boltiqbo‘yi mamlakatlari va Yevropa Ittifoqining boshqa davlatlari rasmiy norozilik e’lon qildi. Bu haqda Reuters xabar berdi.
Reuters ma’lumotlariga ko‘ra, Latviya, Litva, Estoniya, Slovakiya va Polsha rasman Parij pozitsiyasiga qarshi chiqqan.
Ushbu demarshga qancha davlat qo‘shilgani noma’lum, deb ta’kidlaydi Reuters. Fransiya, Chexiya va Slovakiya tashqi ishlar vazirliklari agentlik so‘rovlariga javob bermagan, Polsha tashqi ishlar vazirligi esa izoh berishdan bosh tortgan.
Hujjat loyihasi Chexiya respublikasi vakillari tomonidan o‘tgan hafta Yevropa Ittifoqining boshqa mamlakatlari poytaxtlariga topshirilgan. Reuters xabariga ko‘ra, unda Rossiya bilan Yevropa xavfsizligi masalalari bo‘yicha muzokaralar g‘oyasi tanqid qilingan.
Dekabr oyi boshida Makron Ukrainadagi urush tugaganidan so‘ng Yevropa yangilangan xavfsizlik arxitekturasini qurishi kerakligini, bu jumladan, Rossiya uchun kafolatlar berishni ham o‘z ichiga olishini aytgandi.
O‘zbekistonda sud tizimining mustaqil bo‘lishi murakkab jarayonmi?
Oliy Majlis Qonunchilik palatasi yig‘ilishida Sud qarorlari qonuniyligi, asosliligi va adolatliligini tekshirish instituti takomillashtirilishi munosabati bilan Jinoyat-protsessual kodeksiga o‘zgartish va qo‘shimchalar kiritishga oid qonun loyihasi birinchi o‘qishda ko‘rib chiqildi. Bu haqda palata axborot xizmati xabar berdi.
Majlisda Oliy sud raisining o‘rinbosari Shuhrat Polvonov mazkur qonunni qabul qilish zarurati haqida gapirdi. 2021-yilda Oliy sud jinoyat ishlari bo‘yicha sudlov hay’ati sudyasining bir oylik o‘rtacha ish hajmi 89 tani tashkil qilgani aytildi.
Buning oqibatida shikoyatdagi vajlar har taraflama tekshirilmay, ish bo‘yicha yakuniy qaror qabul qilinmasdan, sud qarori bekor qilinib, quyi sudlarga yuborish holatlari ko‘paygan. Shu bilan birga, apellyatsiya tartibida ko‘rilmagan ishlarning kelgusida kassatsiya instansiyasida ko‘rib bo‘lmasligi haqidagi qonun talablari fuqarolarning e’tirozlariga sabab bo‘lmoqda. Bu kabi omillar esa, sohani isloh qilish zaruratini keltirib chiqaradi.
Oliy Majlis Qonunchilik palatasi spikeri Nuriddin Ismoilov sudni mustaqil bo‘lishi murakkab jarayon ekanini aytdi.
Deputatlar, senatorlar ham butun jamiyatimiz sudni mustaqil bo‘lishi tarafdorimiz. Prezident sudlar bilan alohida uchrashdi, hatto kadrlar bilan shug‘ullanadigan organ tuzdi. Ikkita palatada navbatma navbat har yili sudni mustaqilligini ta’minlovchi komissiya ishladi. Parlament ham chetda qolmadi.
Qanchadan qancha qonunlarni qabul qilindi. Lekin bu juda murakkab bo‘ldi. Odamlar haqiqiy mustaqil sud bo‘lishini xohlaydi. Jumladan, biz ham. Shuning uchun mana shu qonun juda katta ahamiyatga ega. Hujjatning har bir so‘zini erinmasdan ko‘rib chiqishimiz kerak va uni qabul qilish jarayonini tezlashtirishimizga to‘g‘ri keladi”, – degan quyi palata rasmiysi.
Muhokamalar yakunida qonun loyihasi deputatlar tomonidan qabul qilindi.
Izoh (0)