Rossiya qo‘shinlarining yil oxirigacha Ukrainadan olib chiqib ketilishi haqida “gap ham bo‘lishi mumkinmas”, dedi Rossiya prezidenti matbuot kotibi Dmitriy Peskov jurnalistlar bilan uchrashuvda.
“Ukraina tomoni shu vaqt ichida yuzaga kelgan haqiqatni qabul qilishi kerak. Bu haqiqat Rossiyada yangi subyektlar paydo bo‘lganini ko‘rsatadi. Ular referendumlar natijasida paydo bo‘ldi”, — dedi Peskov.
Bundan tashqari, Kreml vakili Ukraina prezidenti Vladimir Zelenskiyning Ukrainada tinchlik o‘rnatish bo‘yicha taklif qilgan uchta qadamni “harbiy harakatlarni davom ettirish uchun uch qadam” deb atadi.
Rossiya 24-fevraldan beri Ukrainada “maxsus operatsiya” nomi bilan harbiy bosqinni davom ettirmoqda. Vladimir Putin operatsiya maqsadini Ukrainani “demilitarizatsiya” va “denasifikatsiya” qilish, Donbass aholisini himoya qilish va o‘z xavfsizligini ta’minlash deb atagan. Iyun oyi oxirida Putin “maxsus operatsiya”ning davomiyli jangovar harakatlar intensivligi va yo‘qotishlar xavfi bilan bog‘liq bo‘lishini aytgan.
Sentabr oyida Rossiya Donbass respublikalari va Ukrainaning bosib olingan Zaporojye va Xerson viloyatlarida “referendum” o‘tkazib, ularni anneksiya qildi. Tashkilotchilarning ma’lum qilishicha, ushbu hududlar aholisining go‘yoki 87—99 foizi “Rossiyaga qo‘shilish”ni qo‘llab-quvvatlagan. Shundan keyin Ukraina prezidenti Vladimir Zelenskiy Qrim, Donbass, Xerson va Zaporojye viloyatlari mustaqilligini tan olmaslik haqida farmon imzoladi. U, shuningdek, Qrimni qaytarib olish rejalari haqida ham gapirgandi.
12-dekrabr kuni Zelenskiy G7 mamlakatlari yetakchilariga murojaatida “Ukrainada tinchlik o‘rnatilishini tezlashtirish” bo‘yicha uch qadamli rejasini taklif qildi. U Kiyevga yangi turdagi qurol-yarog‘ yetkazib berishni, energetik va moliyaviy ko‘makni hamda Ukraina tomonidan ilgari surilgan 10 bandli “tinchlik formulasi”dan iborat bo‘lgan “yangi diplomatiya”ni o‘z ichiga oladi.
Izoh (0)