Energetika vazirligi axborot xizmatining ma’lum qilishicha, O‘zbekiston Afg‘onistonga elektr energiyasi yetkazib berishda davom etmoqda.
Ta’kidlanishicha, hozirda bitta “Naibobot 1” elektr uzatish tarmog‘i orqali elektr energiyasi yetkazib berilmoqda, ikkinchi “Naibobot 2” tarmog‘ida texnik nosozliklar tufayli ta’mirlash ishlari olib borilmoqda. Shu munosabat bilan Afg‘onistonga elektr energiyasi eksporti qisqargan, biroq to‘xtatilgani yo‘q.
Shu kunlarda 125 MVt elektr energiyasi yetkazib berilmoqda.
Ma’lumot uchun, Afg‘oniston Milliy elektr kompaniyasi (Da Afghanistan Breshna Sherkat – DABS) rasmiy vakili Hikmatulloh Mayvandi O‘zbekistonni elektr energiyasi ta’minotidagi uzilishda ayblagan edi. Uning bayonoti aks etgan videoni “Tolibon” vakili Zabihulloh Mujohid e’lon qilgan.
Mayvandi o‘z murojaatida O‘zbekiston nosozliklar tufayli elektr energiyasini yetkazib berishni to‘xtatganini bildirgan. Shu tariqa O‘zbekiston tomoni Kobul oldidagi shartnoma majburiyatlarini bajara olmagani keltirilgan. Uning qo‘shimcha qilishicha, bugungi kunda Afg‘oniston hukumati ichki quvvatlarni oshirish, jumladan, Afg‘oniston issiqlik elektr stansiyalarini qayta ishga tushirish orqali energiya bo‘shlig‘ini to‘ldirishga harakat qilmoqda. Endilikda, birinchi navbatda, davlat muassasalarining energiya sarfini kamaytirish hisobiga aholi turar joylari elektr energiyasi bilan ta’minlanmoqda.
Mavzuga doir:
- O‘zbekistondan Afg‘onistonga elektr energiyasi yetkazib berish to‘xtatildi
- O‘zbekiston Afg‘onistonga elektr energiyasi yetkazib berishni ikki baravar qisqartirdi
- O‘zbekistonda yanvardagi kabi blekaut takrorlanishi mumkinmi? Energetika vaziri bunga aniqlik kiritdi
- O‘zbekistonning turli hududlarida elektr ta’minotida cheklovlar kiritiladi
Izoh (0)