O‘zbekistonning 14 ta hududida 2023-yildan boshlab maktablarning 1—4-sinflarida Finlyandiya ekpertizasidan o‘tgan darsliklar joriy qilinishi haqida xabar berilgandi. Abdulla Avloniy nomidagi milliy-tadqiqot institutida mazkur metodikaga asoslangan maktab ta’limini o‘qitish istagidagi o‘qituvchilarga seminar tashkil etildi, deya xabar bermoqda “Daryo” muxbiri Abduqahhor Qosimov.
Malaka oshirish kurslarining birinchi bosqichi 4—9-noyabr kunlari bo‘lib o‘tgan. Unda xorij tajribasida ishtirok etish istagini bildirgan 139 nafar boshlang‘ich sinf o‘qituvchisining malakasi oshirilgan.
12—15-dekabr kunlari o‘quv-seminarning ikkinchi bosqichi bo‘lib o‘tishi rejalashtirilgan. Dars jarayonlari 15 nafar pedagogni o‘z ichiga oluvchi 4 guruhda tashkil etilgan bo‘lib, ular quyidagilarni iborat:
- tasviriy san’at fani o‘qituvchilari;
- texnologiya fani o‘qituvchilari;
- musiqa madaniyati fani o‘qituvchilari;
- jismoniy tarbiya fani o‘qituvchilari.
Milliy-tadqiqot instituti prorektori Mehriniso Pardayevaning aytishicha, boshlang‘ich sinf o‘quvchilariga mo‘ljallangan elektron darslik va dasturlar, bolalarni muammoni hal etish va zarur xulosaga kelishga undovchi turli o‘yin shaklidagi metodik ishlar mazkur xalqaro ta’lim yo‘nalishining asosini tashkil etadi.
Xalqaro tajribalar o‘zini oqlagan, yaxshi ekanini isbotlagan metodikalardir. Tadqiqotlar davomida ular bizning milliy qadriyatlarimiz, mentalitetimizga mos ravishda takomillashtirilib, keyin joriy etiladi. Nega aynan Finlyandiya tajribasi? Chunki mana shu o‘qitish usuli turli baholash reytinglarida yuqori o‘rinlarni egallagan, — deydi Mehriniso Pardayeva.Uning ma’lum qilishicha, mazkur tajriba 2023/2024-o‘quv yilidan boshlab joriy etiladi.
Agar ikki chorak davomida xalqaro tajriba asosida yaratilgan darsliklar o‘zini oqlasa, u yangi o‘quv yilidan boshlab ommaviy ravishda barcha maktablarda qo‘llanadi. Agar qaysidir jihatlarda takomillashtirish ehtiyoji tug‘ilsa yoki biror metodikadan voz kechish zarurati paydo bo‘lsa, tajriba-sinov jarayonida aniqlik kiritiladi, — deydi institut prorektori.Mazkur tajribada ishtirok etgan Termiz shahridagi 12-maktab direktori Malohat Xoliyevaning so‘zlariga ko‘ra, bu amaliyot O‘zbekistonning 30 yillik ta’lim tizimida kamchilik borligi uchun emas, aksincha, yangilik, xorij tajribasi ko‘proq samara berishi mumkin ekani tufayli amaliyotda qo‘llanishi rejalashtirilgan.
Fin ta’lim dasturida shunday ekanki, tabiat fanida laylak mavzusi o‘tilayotgan bo‘lsa, ona tili fani ham laylak atrofiga quriladi, gaplar shu bo‘yicha tuziladi. Matematikada misollar ishlashda, chizmachilikda rasm chizishda, texnologiya fanida buyumlar yasashda ham laylak obyektidan foydalaniladi. Bola laylak mavzusini to‘liq, har tomonlama o‘rganadi, — deya fikrlarini izohlagan Malohat Xoliyeva.Maktab direktorining qo‘shimcha qilishicha, yangi metodika bolalardagi ijodkorlik qobiliyatlarini shakllantirib, o‘zgacha fikrlashga o‘rgatadi.
Hozirgi ta’limda o‘quvchiga kitobda bor narsa o‘rgatiladi, shu kitob bo‘yicha uyga vazifa beriladi, bola ham shu bo‘yicha o‘rganadi. Fin ta’limidagi dars jarayonida esa bolaning ko‘proq mantiqiy fikrlashi, ijodkorligiga e’tibor beriladi, — deydi u.Mavzuga doir:
- O‘zbekiston o‘z ta’lim tizimida nega aynan Finlyandiya usulidan foydalanmoqchi?
- Darsliklarni yangilash jarayoni: maxsus tayyorlov kursini o‘tagan o‘qituvchilar qanday fikrda? (video)
- “Tasavvur qiling, 10 yildan keyin qanday bolalar chiqadi maktablardan”. Shavkat Mirziyoyev ta’limga Finlyandiya tajribasi joriy etilishi haqida
Izoh (0)