Farg‘onada haydovchilik guvohnomasini beruvchi “Farg‘ona viloyati imtihon markazi” ochildi. Bu haqda “Daryo” muxbiri Azizjon Ermatov xabar bermoqda.
Farg‘ona tumani “O‘rtasho‘ra” mahalla fuqarolar yig‘ini hududida barpo etilgan mazkur imtihon markazi bir kunda 450 nafardan ortiq talabgorni nazariy, 300 nafardan ortiq talabgorni esa amaliy imtihondan o‘tkazish imkoniyatiga ega.
Markazda nazariy imtihonlarni o‘tkazish uchun texnik va texnologik vositalar bilan maxsus jihozlangan xonalar, avtomototransport vositalarining barcha toifalari bo‘yicha amaliy imtihonlarni topshirish uchun avtomatlashtirilgan avtodrom mavjud.
Qayd etilishicha innovatsion markaz — bu haydovchilik guvohnomasini olishga nomzodlar uchun nazariy va amaliy sinovlardan iborat avtomatlashtirilgan imtihon kompleksi. Markazning afzalliklaridan biri shundaki, nomzodlar bilimini baholashda inson omili ishtirok etmaydi, butun jarayon avtomatlashtirilgan hamda shaffof.
Markazning tantanali ochilish tadbirida viloyat hokimi Xayrullo Bozorov, Ichki ishlar vazirining o‘rinbosari – Jamoat xavfsizligi departamenti boshlig‘i Bekmurod Abdullayev, Ichki ishlar vazirligi Yo‘l harakati xavfsizligi bosh boshqarmasi boshlig‘i Olim Saidov ishtirok etdi.
Izoh (0)