Shavkat Mirziyoyev Chilonzor issiqlik markazini borib ko‘rdi. Markazda uskuna va tarmoqlar eskirgan (foto)

Shavkat Mirziyoyev “Toshkent issiqlik markazi” korxonasining Chilonzor issiqlik markazini borib ko‘rdi. Bu haqda prezident matbuot xizmati xabar bermoqda.

Qayd etilishicha, ushbu majmua 1969-yilda qurilgan. Qozonxona 700 Gkal quvvatga ega. Markaz 921 ta ko‘p qavatli uy va 100 dan ortiq ijtimoiy soha obyektlariga issiqlik quvvati yetkazib beradi.

So‘nggi kunlarda ob-havoning keskin sovib ketishi oqibatida gaz bosimining pastligi kuzatilmoqda. Bu isitish darajasiga salbiy ta’sir qilmoqda. Chilonzor issiqlik markazida ham uskuna va tarmoqlar eskirgan. Issiqlikni uzatishda yo‘qotishlar bor. Shu bois bu boradagi zaruriy chora-tadbirlar muhokama qilindi.

Davlat rahbari issiqlik ishlab chiqarishning muqobil manbalarini izlash, quvurlar va uylarda haroratni asrash zarurligini ta’kidladi. Toshkent shahri tumanlariga elektrda ishlaydigan 2 megavattli stansiyalar olib kelib, qo‘shimcha issiqlik quvvatlari yaratish taklifi ma’qullandi. Bunday bitta qurilma 1 ming 340 ta xonadonga issiqlik yetkazib beradi. Ishlab chiqarish xarajati kamligi evaziga narx oshmaydi.

Shavkat Mirziyoyev kutilmaganda shu yerdagi “Shirin” mahallasini kirib ko‘rdi. Aholi xonadonlarida bo‘lib, turmush sharoitlari, issiqlik ta’minoti bilan qiziqdi.

Mavzuga doir:

• “Bugun Uchtepada ‘oldindan tayyorlangan’ ko‘chalarga emas, boshqa ko‘chalarga kirdim, ahvol qoniqarli emas” — prezident
• “O‘zbekiston havo yo‘llari kompaniyasini ham isloh qilish vaqti keldi” — Shavkat Mirziyoyev
• Poytaxtda jamoat transportiga qo‘shimcha avtobuslar qo‘yiladi