Энергетика вазирлиги ахборот хизматининг маълум қилишича, Ўзбекистон Афғонистонга электр энергияси етказиб беришда давом этмоқда.
Таъкидланишича, ҳозирда битта «Наибобот 1» электр узатиш тармоғи орқали электр энергияси етказиб берилмоқда, иккинчи «Наибобот 2» тармоғида техник носозликлар туфайли таъмирлаш ишлари олиб борилмоқда. Шу муносабат билан Афғонистонга электр энергияси экспорти қисқарган, бироқ тўхтатилгани йўқ.
Шу кунларда 125 МВт электр энергияси етказиб берилмоқда.
Маълумот учун, Афғонистон Миллий электр компанияси (Da Afghanistan Breshna Sherkat – DABS) расмий вакили Ҳикматуллоҳ Майванди Ўзбекистонни электр энергияси таъминотидаги узилишда айблаган эди. Унинг баёноти акс этган видеони «Толибон» вакили Забиҳуллоҳ Мужоҳид эълон қилган.
Майванди ўз мурожаатида Ўзбекистон носозликлар туфайли электр энергиясини етказиб беришни тўхтатганини билдирган. Шу тариқа Ўзбекистон томони Кобул олдидаги шартнома мажбуриятларини бажара олмагани келтирилган. Унинг қўшимча қилишича, бугунги кунда Афғонистон ҳукумати ички қувватларни ошириш, жумладан, Афғонистон иссиқлик электр станцияларини қайта ишга тушириш орқали энергия бўшлиғини тўлдиришга ҳаракат қилмоқда. Эндиликда, биринчи навбатда, давлат муассасаларининг энергия сарфини камайтириш ҳисобига аҳоли турар жойлари электр энергияси билан таъминланмоқда.
Мавзуга доир:
- Ўзбекистондан Афғонистонга электр энергияси етказиб бериш тўхтатилди
- Ўзбекистон Афғонистонга электр энергияси етказиб беришни икки баравар қисқартирди
- Ўзбекистонда январдаги каби блэкаут такрорланиши мумкинми? Энергетика вазири бунга аниқлик киритди
- Ўзбекистоннинг турли ҳудудларида электр таъминотида чекловлар киритилади
Изоҳ (0)