Shavkat Mirziyoyev: “Poytaxtda elektr energiya va issiqlik ishlab chiqaruvchi stansiyalar quriladi”

Prezident Shavkat Mirziyoyev ayni vaqtda Uchtepa tumani faollari bilan yig‘ilish o‘tkazmoqda. Bu haqda “Daryo” muxbiri xabar bermoqda.

Shavkat Mirziyoyev Toshkentda issiqlik markazlari eskirgan va energiya sarfi juda yuqori ekanligini aytdi.

“Ammo shunga yarasha issiqlik ham ishlab chiqara olmaydi. Bitta stansiya sarflayotgan gaz va elektr energiyasi bilan katta hududni ta’minlash mumkin. Shaharda oxirgi yillarda misli ko‘rilmagan darajada ishlab chiqarish korxonalari ochildi. Albatta, ularning energiyaga bo‘lgan talabi ham shunga yarasha”, — dedi prezident.

Davlat rahbari 55 ming ish o‘rni yaratish rejalashtirilayotganini aytdi.

"Tabiiyki, bu ish joylariga hech bo‘lmasa chiroq o‘rnatish kerak. Qolgan texnologiyalarni gapirish ham shart emas. Yil o‘tgani sari elektr energiyasiga bo‘lgan ehtiyoj oshib boradi. Biz avvalo zamonaviy texnologiyalarni joriy etishimiz lozim.

Xorijdan ham elektr energiya, ham issiqlik ishlab chiqaruvchi texnologiyalar olib kelamiz va issiqlik markazlarini qayta jihozlaymiz. Uch million kishi yashaydigan shaharning ta’minoti uchun har kuni yangilik qilish kerak», — dedi Shavkat Mirziyoyev.