Navoiydagi gaz zapravkada tabiiy gaz sarfini hisoblash uskunasi tekshirish metodikasi talablariga javob bermasligi oqibatida 1,5 milliard so‘m zarar yetkazildi.
Bosh prokuratura huzuridagi Departament hamda DXXning Navoiy viloyati boshqarmalari tomonidan o‘tkazilgan tergovga qadar tekshiruvda, “B.E.” MCHJga qarashli avtomobillarga gaz quyish shoxobchasida tabiiy gaz sarfini hisoblash uskunasi tekshirish metodikasi talablariga javob bermasligi, bosim kanalidagi ko‘rsatkichlar noto‘g‘ri ishlab kelgani aniqlangan.
Oqibatda davlat va jamiyat manfaatlariga 1,5 milliard so‘m zarar yetkazilgan.
Bosh prokuratura huzuridagi Departamentning Andijon shahar bo‘limi tomonidan o‘tkazilgan tergovga qadar tekshiruvda esa, “Hududgaz Andijon” gaz ta’minoti Andijon shahar bo‘limi mansabdor shaxslari xizmat vazifalariga sovuqqonlik bilan qaragani oqibatida, “E.b.” va “M.M.” MCHJlar tomonidan tabiiy gaz tarmog‘iga o‘zboshimchalik bilan ulanib, ohak ishlab chiqarish faoliyati bilan shug‘ullanib, davlat va jamiyat manfaatlariga 2,1 milliard so‘mlik zarar yetkazilgani aniqlangan.
Mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) va 207-moddasi (mansabga sovuqqonlik bilan qarash) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)