O‘zbekiston bosh vaziri o‘rinbosari — energetika vaziri Jo‘rabek Mirzamahmudov energiya ta’minotidagi uzilishlar yuzasidan jamoatchilikka murojaat qilib, holatga izoh berdi.
Aholida elektr iste’moli oshishi hisobga olinsa, O‘zbekistonda yana takroran — yanvardagi kabi blekaut kuzatilishi mumkinmi?
— Blekaut texnologik holat bo‘lib, bu xavf doim mavjud. Buni inkor qilish kerak emas, chunki energiya tizimimiz nafaqat o‘zimizda, balki qo‘shni mamlakatlar bilan ham integratsiyalashgan. Shuni inobatga olgan holda biz yanvar oyida bo‘lgan blekautdan tegishli saboq chiqargan holda birinchi navbatda avtomatik o‘chirish qurilmalari, avariyaviy holatlarning oldini olish tizimlari, markaziy dispetcherlik tizimi tashkil qilindi.
Cheklovlar kiritilayotganining asosiy sababi ham shuki, blekaut holatlarining oldini olmoqchimiz. Agar shunday cheklovlar kiritilmasa, albatta, energiya tizimi izdan chiqishi va blekaut yuzaga kelishi mumkin, — deydi vazir.
Yanvar oyidagi blekaut
Ma’lumot uchun, 2022-yil 25-yanvar kuni soat 11:00 da O‘zbekistonning qator viloyatlarida elektr energiyasi ta’minoti uzilgan. Toshkent metropoliteni faoliyati ham to‘xtagan, respublikadagi barcha poyezdlar o‘z manzillariga kechikib yetib borishi aytilgan. Toshkent shahri IIBB tibandliklarning oldini olish maqsadida ko‘chaga zarurat bo‘lmasa, shaxsiy mashinada chiqmaslikni tavsiya qilgan.
Mavzuga doir: Elektr tizimidagi uzilishlar oqibatida yetkazilgan zarar hisob-kitob qilinadi — Moliya vazirligi
Energetika vazirligi Toshkent viloyatidagi Chorvoq, Hojikent va Tovoqsoy gidroelektr stansiyalari, Navoiy viloyatidagi Navoiy issiqlik elektr stansiyasi, Qoraqalpog‘iston Respublikasidagi Taxiatosh issiqlik elektr stansiyasi hamda Farg‘ona viloyatidagi Farg‘ona issiqlik elektr markazi orqali energetika tizimiga quvvat uzatish boshlanganini bildirgan. “Daryo” nashri xodimlari va o‘quvchilari soat 14:00 holatiga Toshkent shahrining ayrim hududlarida elektr ta’minoti tiklanganini xabar qilgan.
Keyinroq Prezident matbuot kotibi Sherzod Asadov “vaziyat shaxsan prezident nazorati ostida” ekanini ma’lum qilib, fuqarolarni sarosimaga tushmaslikka chaqirgan. Shavkat Mirziyoyev topshirig‘i bilan elektr energiyasida kuzatilayotgan nosozlik bo‘yicha hukumat ishtirokida komissiya tuzilgan.
17:00 da Energetika vazirligi Qoraqalpog‘iston va Xorazmda elektr energiyasi to‘liq tiklanganini xabar qilgan. 18:00 dan keyin Toshkent shahri va Sirdaryo viloyatining bir qator hududlarida ichimlik suvi ta’minoti tiklangan. 19:00 da Toshkent IESning faoliyati qisman tiklanib, 7 ta energoblokdan 5 tasi barqaror ish faoliyatiga keltirilgani ma’lum qilingan.
Shuningdek, 19:30 dan keyin Favqulodda vaziyatlar vazirligi Qamchiq dovonidagi avtoyo‘l tunellarida yoritish tizimlari tiklangani haqida xabar bergan. Markaziy Osiyo yagona elektr tarmog‘ida 25-yanvar kuni katta avariya bo‘lishi oqibatida O‘zbekistonning Afg‘onistonga elektr energiyasi yetkazib berishni to‘xtatgani oydinlashgan.
Izoh (0)