Yakunlanayotgan hafta boshida ijtimoiy tarmoq foydalanuvchilari gaz ta’minotidagi uzilishlar, elektr tokidagi cheklovlar to‘g‘risidagi muammolar haqida yozgan bo‘lsa, hafta o‘rtasida Mudofa vazirligi Termiz shahrida xizmat qilayotgan askar yigitning uyigi o‘lib qaytgani bilan bog‘liq savollarga javob berdi.
Kuz-qish mavsumi kirib kelganidan so‘ng Namangan viloyatida elektr energiyasi bo‘yicha murojaatlar ko‘paygani, fuqarolar dispetcherlik xizmatlari yoki Call-markazlarga qo‘ng‘iroq qilib tushishga qiynalayotganidan so‘ng “Namangan hududiy elektr tarmoqlari” korxonasi tomonidan ijtimoiy tarmoqlarda “Namangan elektr ta’minoti” deb nomlangan guruh ochilgan. 7,5 mingga yaqin a’zosi bo‘lgan ushbu guruh viloyatning turli hududlaridan yo‘llangan murojaat, shikoyat va savollarga ko‘milib ketgan.
“11-noyabr Xalqaro elektr energiyasini tejash kuni ekan. Namanganda bu sanani har kuni nishonlayapmiz” deya kinoya qiladi foydalanuvchilardan biri. “Biror hokim yo prokurorning uyida bir soat ‘svet’ bo‘lmasa bormi, nima bo‘ladi?” deya savol yo‘llagan boshqa bir foydalanuvchi. “Nanay qishlog‘ida ‘svet’ni bir kunda 15 marta o‘chirib-yoqishyapti. Nima, qishloqdagilar odam emasmi?” deyiladi Yangiqo‘rg‘on tumanidan yo‘llangan e’tirozda. Yana bir foydalanuvchi esa “Elektr ta’minoti korxonasini ‘UzAvto’dan nima farqi bor? Sizlar ham oldindan to‘lov qildirib istalgan payt ‘svet’ berasizlar, u ham nari borsa 5 daqiqaga” deya zaharxanda qilgan.
Yakunlanayotgan haftaning yana bir eng shov-shuvli voqeasi bu — Qarshi shahrida yashovchi askar yigit Termiz shahridagi xizmati davomida vafot etgani va uyiga o‘lik holda qaytgani bo‘ldi. Ko‘p o‘tmay Mudofaa vazirligi askar yigit o‘limiga yuragidagi nuqsoni sabab bo‘lganini bildirdi.
“Daryo” muxbiri bilan suhbatlashgan marhumning yaqini Anvar Shukurovning aytishicha, jasadda tig‘ izlari bo‘lgan.
“Jasadda tig‘ izi bor. Buni tez tibbiy yordam xodimlari ham tasdiqlashdi. Ularni chaqirgandim, sal kech kelishdi. Ular kelgan paytda jiyanimni yuvib, o‘rab, qabrga olib ketmoqchi bo‘lib turgandik. Shuning uchun murdani ochmadik. Ammo shu videoni ko‘rsatganimda tez yordam shifokori ham bu tig‘ izi ekanini tasdiqladi”, — degandi Anvar aka.
Mudofaa vazirligining tibbiy ta’minot boshqarmasi boshlig‘i Bahodir Abdulahatov AOKAda bo‘lib o‘tgan matbuot anjumanida “Jarrohlik amaliyotidan so‘ng ko‘krak qafasini drenajlash bo‘ladi. Marhumning yaqinlari aytayotgan o‘sha tig‘ni drenaj qo‘ygan bo‘ladi. Ko‘krak qafasini teshib, qovurg‘alar orasiga to‘rt-beshta drenaj qo‘yiladi. Operatsiyadan so‘ng qon ketib qoladigan bo‘lsa, biz uni nazorat qilishimiz kerak bo‘ladi-da. To‘satdan o‘lim holatlari yoki asoratlarining oldini olishimiz uchun bu — drenajlash kerak bo‘ladi. Marhumning yaqinlari aytayotgan tig‘ mana shu. Marhum aynan shu tig‘lar asosida vafot etdi deyish noto‘g‘ri”, — dedi.
Matbuot anjumanida so‘z olgan “Kun.uz” muxbiri Jamshid Niyozov vazirlik mas’ullariga yuzlanib, askar yigit o‘limidan avval harbiy gospitalda emas, xususiy klinikada operatsiya qilinishining sababi bilan qiziqdi.
“Jarrohlik amaliyoti nega aynan harbiy gospitalda emas, xususiy klinikada amalga oshirildi. Hozirgi matbuot anjumanida Mudofaa vazirligining tibbiy ta’minoti juda yaxshi ekani, 98 turdagi zamonaviy tibbiyot uskunalari olib kelingani aytilmoqda. Xo‘sh, unda nega xususiy klinikaga ehtiyoj tug‘ildi”, — dedi Jamshid Niyozov.
“Bizda ishlovchi kardiojarroh Rustam Yarbekov ismli professorimiz to‘rtta klinikada ham ishlaydi. Shu bois biz o‘zimizning tekshiruvimizdan so‘ng, malakali mutaxassisga ko‘rsatish uchun bemorni ularga olib bordik. Bizning dastlabki xulosamiz tasdiqlandi. Biz tashxis qo‘yib, amaliyotga tayyor edik. Tekshiruvdan so‘ng shifokorimiz ‘Yuragidagi tromb ko‘chib ketadigan bo‘lsa, to‘satdan o‘lim holati yuz berishi mumkin. Shu bois bemorni qimirlatishga ham ruxsat bermayman. O‘zim jarrohlik amaliyotini o‘tkazib, trombini olib tashlaymiz’, deb xulosa qilganini aytdi. Shundan so‘ng bemor yuragidagi tromb olib tashlandi”, — dedi bunga javoban Bahodir Abdulahatov.
Mudofaa vazirligi mas’uli marhum askar xizmatga sog‘lom kelganini, yuragidagi o‘simta 8 oylik xizmati davomida paydo bo‘lganini ma’lum qildi.
“Marhum yigit armiyaga chaqirilayotgan vaqtda Mudofaa ishlari bo‘limida tibbiy tekshiruvdan o‘tkazilgan. Unda bunday o‘sma alomatlari bo‘lmagan. Biz marhumning barcha tibbiy kartalarini tekshirib ko‘rdik. U yerda hech qanday o‘sma alomatlari yo‘q. Fakt shundaki, askar yigit kelgan vaqtida hududiy tibbiy komissiyada hamda viloyat Mudofaa ishlari boshqarmasidagi harbiy tibbiy komissiyadan o‘tganda soppa-sog‘ bo‘lgan”, — dedi Mudofaa vazirligining tibbiy ta’minot boshqarmasi boshlig‘i Bahodir Abdulahatov.
O‘tayotgan haftada, shuningdek, Qoraqalpog‘istonning Taxiatosh tumani hokimi fermerdan olgan 100 million so‘m porani turmush o‘rtog‘i orqali olishga uringani ma’lum qilindi. Qoraqalpog‘istonning yangi rahbari Amanbay O‘rinbayev hududdagi rahbarlarning bundayin qilmishiga chek qo‘yish maqsadida raislik faoliyati davomida 15 nafar mansabdorni ishdan olib, 116 nafar mansabdorga intizomiy chora ko‘rganini bildirdi. Jo‘qorg‘i Kenges axborot xizmatining ma’lum qilishicha, bunga lavozim egalarining davlat dasturlari asosida belgilangan vazifalarning bajarilishi va o‘z sohalari bo‘yicha yuklatilgan vazifalarning bajarilishida bir qator kamchiliklarga yo‘l qo‘yib, o‘ziga bildirilgan ishonchga mas‘uliyatsizlik bilan qaraganliklari sabab bo‘lgan.
Haftaning yana bir shov-shuvli voqeasi bu — Oila va xotin-qizlar qo‘mitasi mas’ullarining jurnalistga binoni suratga olishini taqiqlashi-yu, Milliy gvardiya xodimlarining jurnalist faoliyatiga xalal berib, uni to‘xtatishga urinishi bo‘ldi. Qo‘mita matbuot xizmati rahbari Nilufar Jumayeva ham jurnalistga qo‘mita binosini suratga olishni qo‘mita raisining shaxsan o‘zi buyurganini aytib, jurnalistning og‘izaki so‘rovlariga javob berishmasligini, jurnalist qo‘mitadan axborot olish uchun rasmiy xat bilan murojaat qilishi kerakligini bildirdi. Ko‘p o‘tmay bu xususida jurnalist chiqishiga munosabat bildirgan qo‘mita raisi matbuot kotibiga binoni suratga olishni taqiqlagani haqida bildirmaganini, matbuot kotibi bu borada o‘zboshimchalikka yo‘l qo‘yganini aytdi. Shundan so‘ng qo‘mita matbuot kotibi tushuntirish xati yozishdan bosh tortib, ishdan bo‘shash haqida ariza yozganini bildirdi.
Izoh (0)