Surxondaryoning Jarqo‘rg‘on tumanida asfaltsiz loyli yo‘llardan norozi aholisi yo‘lni to‘sib qo‘ygani haqida xabarlar va holat aks etgan video ijtimoiy tarmoqlarda tarqaldi. Viloyat hokimligi vaziyatga aniqlik kiritdi.
Unda aytilishicha, tarqalgan videomaterialda Jarqo‘rg‘on tumani markaziga olib boruvchi 4R-100b avtomobil yo‘lining 0-11 kilometr qismi tasvirga olingan bo‘lib, avtomobil yo‘lining yuk ko‘tarish qobiliyati bir o‘qqa tushadigan tegishli me’yoriy og‘irlikdan og‘ir bo‘lgan yuk avtomobillarining muntazam ravishda harakatlanishi oqibatida yo‘l ta’mirtalab holatga kelib qolgan.
Hozirda Jarqo‘rg‘on tuman Yo‘llardan foydalanish unitar korxonasi tomonidan bor kuch va vositalarni ishga solgan holda birinchi navbatda ushbu avtomobil yo‘lida transport vositalarining harakat xavfsizligi va uzluksizligini ta’minlash choralari ko‘rilgan.
Surxondaryo viloyati avtomobil yo‘llari bosh boshqarmasi va boshqa mutasaddi tashkilotlar mas’ullari aholi vakillari bilan uchrashib, 4R-100b avtomobil yo‘lining 0-11 kilometr qismini ta’mirlash ishlari 2023-yil 1 choragida amalga oshirilishi belgilangani yuzasidan tushuntirish ishlari olib borgan.
Aholining noroziligiga sabab bo‘lgan ushbu masala Surxondaryo viloyati avtomobil yo‘llari bosh boshqarmasi tomonidan nazoratga olingan.
Izoh (0)