Якунланаётган ҳафта бошида ижтимоий тармоқ фойдаланувчилари газ таъминотидаги узилишлар, электр токидаги чекловлар тўғрисидаги муаммолар ҳақида ёзган бўлса, ҳафта ўртасида Мудофа вазирлиги Термиз шаҳрида хизмат қилаётган аскар йигитнинг уйиги ўлиб қайтгани билан боғлиқ саволларга жавоб берди.
Куз-қиш мавсуми кириб келганидан сўнг Наманган вилоятида электр энергияси бўйича мурожаатлар кўпайгани, фуқаролар диспетчерлик хизматлари ёки Call-марказларга қўнғироқ қилиб тушишга қийналаётганидан сўнг «Наманган ҳудудий электр тармоқлари» корхонаси томонидан ижтимоий тармоқларда «Наманган электр таъминоти» деб номланган гуруҳ очилган. 7,5 мингга яқин аъзоси бўлган ушбу гуруҳ вилоятнинг турли ҳудудларидан йўлланган мурожаат, шикоят ва саволларга кўмилиб кетган.
«11 ноябрь Халқаро электр энергиясини тежаш куни экан. Наманганда бу санани ҳар куни нишонлаяпмиз» дея киноя қилади фойдаланувчилардан бири. «Бирор ҳоким ё прокурорнинг уйида бир соат ‘свет’ бўлмаса борми, нима бўлади?» дея савол йўллаган бошқа бир фойдаланувчи. «Нанай қишлоғида ‘свет’ни бир кунда 15 марта ўчириб-ёқишяпти. Нима, қишлоқдагилар одам эмасми?» дейилади Янгиқўрғон туманидан йўлланган эътирозда. Яна бир фойдаланувчи эса «Электр таъминоти корхонасини ‘УзАвтo’дан нима фарқи бор? Сизлар ҳам олдиндан тўлов қилдириб исталган пайт ‘свет’ берасизлар, у ҳам нари борса 5 дақиқага» дея заҳарханда қилган.
Якунланаётган ҳафтанинг яна бир энг шов-шувли воқеаси бу — Қарши шаҳрида яшовчи аскар йигит Термиз шаҳридаги хизмати давомида вафот этгани ва уйига ўлик ҳолда қайтгани бўлди. Кўп ўтмай Мудофаа вазирлиги аскар йигит ўлимига юрагидаги нуқсони сабаб бўлганини билдирди.
«Дарё» мухбири билан суҳбатлашган марҳумнинг яқини Анвар Шукуровнинг айтишича, жасадда тиғ излари бўлган.
«Жасадда тиғ изи бор. Буни тез тиббий ёрдам ходимлари ҳам тасдиқлашди. Уларни чақиргандим, сал кеч келишди. Улар келган пайтда жиянимни ювиб, ўраб, қабрга олиб кетмоқчи бўлиб тургандик. Шунинг учун мурдани очмадик. Аммо шу видеони кўрсатганимда тез ёрдам шифокори ҳам бу тиғ изи эканини тасдиқлади», — деганди Анвар ака.
Мудофаа вазирлигининг тиббий таъминот бошқармаси бошлиғи Баҳодир Абдулаҳатов АОКАда бўлиб ўтган матбуот анжуманида «Жарроҳлик амалиётидан сўнг кўкрак қафасини дренажлаш бўлади. Марҳумнинг яқинлари айтаётган ўша тиғни дренаж қўйган бўлади. Кўкрак қафасини тешиб, қовурғалар орасига тўрт-бешта дренаж қўйилади. Операциядан сўнг қон кетиб қоладиган бўлса, биз уни назорат қилишимиз керак бўлади-да. Тўсатдан ўлим ҳолатлари ёки асоратларининг олдини олишимиз учун бу — дренажлаш керак бўлади. Марҳумнинг яқинлари айтаётган тиғ мана шу. Марҳум айнан шу тиғлар асосида вафот этди дейиш нотўғри», — деди.
Матбуот анжуманида сўз олган «Kun.uz» мухбири Жамшид Ниёзов вазирлик масъулларига юзланиб, аскар йигит ўлимидан аввал ҳарбий госпиталда эмас, хусусий клиникада операция қилинишининг сабаби билан қизиқди.
«Жарроҳлик амалиёти нега айнан ҳарбий госпиталда эмас, хусусий клиникада амалга оширилди. Ҳозирги матбуот анжуманида Мудофаа вазирлигининг тиббий таъминоти жуда яхши экани, 98 турдаги замонавий тиббиёт ускуналари олиб келингани айтилмоқда. Хўш, унда нега хусусий клиникага эҳтиёж туғилди», — деди Жамшид Ниёзов.
«Бизда ишловчи кардиожарроҳ Рустам Ярбеков исмли профессоримиз тўртта клиникада ҳам ишлайди. Шу боис биз ўзимизнинг текширувимиздан сўнг, малакали мутахассисга кўрсатиш учун беморни уларга олиб бордик. Бизнинг дастлабки хулосамиз тасдиқланди. Биз ташхис қўйиб, амалиётга тайёр эдик. Текширувдан сўнг шифокоримиз ‘Юрагидаги тромб кўчиб кетадиган бўлса, тўсатдан ўлим ҳолати юз бериши мумкин. Шу боис беморни қимирлатишга ҳам рухсат бермайман. Ўзим жарроҳлик амалиётини ўтказиб, тромбини олиб ташлаймиз’, деб хулоса қилганини айтди. Шундан сўнг бемор юрагидаги тромб олиб ташланди», — деди бунга жавобан Баҳодир Абдулаҳатов.
Мудофаа вазирлиги масъули марҳум аскар хизматга соғлом келганини, юрагидаги ўсимта 8 ойлик хизмати давомида пайдо бўлганини маълум қилди.
«Марҳум йигит армияга чақирилаётган вақтда Мудофаа ишлари бўлимида тиббий текширувдан ўтказилган. Унда бундай ўсма аломатлари бўлмаган. Биз марҳумнинг барча тиббий карталарини текшириб кўрдик. У ерда ҳеч қандай ўсма аломатлари йўқ. Факт шундаки, аскар йигит келган вақтида ҳудудий тиббий комиссияда ҳамда вилоят Мудофаа ишлари бошқармасидаги ҳарбий тиббий комиссиядан ўтганда соппа-соғ бўлган», — деди Мудофаа вазирлигининг тиббий таъминот бошқармаси бошлиғи Баҳодир Абдулаҳатов.
Ўтаётган ҳафтада, шунингдек, Қорақалпоғистоннинг Тахиатош тумани ҳокими фермердан олган 100 миллион сўм порани турмуш ўртоғи орқали олишга урингани маълум қилинди. Қорақалпоғистоннинг янги раҳбари Аманбай Ўринбаев ҳудуддаги раҳбарларнинг бундайин қилмишига чек қўйиш мақсадида раислик фаолияти давомида 15 нафар мансабдорни ишдан олиб, 116 нафар мансабдорга интизомий чора кўрганини билдирди. Жўқорғи Кенгес ахборот хизматининг маълум қилишича, бунга лавозим эгаларининг давлат дастурлари асосида белгиланган вазифаларнинг бажарилиши ва ўз соҳалари бўйича юклатилган вазифаларнинг бажарилишида бир қатор камчиликларга йўл қўйиб, ўзига билдирилган ишончга масъулиятсизлик билан қараганликлари сабаб бўлган.
Ҳафтанинг яна бир шов-шувли воқеаси бу — Оила ва хотин-қизлар қўмитаси масъулларининг журналистга бинони суратга олишини тақиқлаши-ю, Миллий гвардия ходимларининг журналист фаолиятига халал бериб, уни тўхтатишга уриниши бўлди. Қўмита матбуот хизмати раҳбари Нилуфар Жумаева ҳам журналистга қўмита биносини суратга олишни қўмита раисининг шахсан ўзи буюрганини айтиб, журналистнинг оғизаки сўровларига жавоб беришмаслигини, журналист қўмитадан ахборот олиш учун расмий хат билан мурожаат қилиши кераклигини билдирди. Кўп ўтмай бу хусусида журналист чиқишига муносабат билдирган қўмита раиси матбуот котибига бинони суратга олишни тақиқлагани ҳақида билдирмаганини, матбуот котиби бу борада ўзбошимчаликка йўл қўйганини айтди. Шундан сўнг қўмита матбуот котиби тушунтириш хати ёзишдан бош тортиб, ишдан бўшаш ҳақида ариза ёзганини билдирди.
Изоҳ (0)