Qozog‘istonda bugun, 20-noyabr kuni prezidentlik saylovlari boshlandi, butun mamlakat bo‘ylab saylov uchastkalari ochildi.
Davlat rahbari lavozimiga olti nafar nomzod da’vogarlik qilmoqda:
- “Professional ijtimoiy ishchilar milliy alyansi” respublika jamoat birlashmasidan Karakat Abden;
- Umummilliy sotsial-demokratik partiyadan Nurlan Auyesbayev;
- “Ovul” Xalq demokratik vatanparvarlik partiyasidan Jiguli Dairaboyev;
- “Qozog‘iston kasaba uyushmalari hamdo‘stligi “Amanat” kasaba uyushmalari respublika birlashmasidan Meyram Kajiken;
- “Qazaq analari – dasturge jol” respublika jamoat birlashmasidan Saltanat Tursinbekova;
- Qozog‘istonning amaldagi prezidenti Qosim-Jo‘mart To‘qayev. Mamlakat Markaziy saylov komissiyasi rasmiy byulletenida aytilishicha, u “qator respublika jamoat birlashmalari”dan nomzod sifatida ko‘rsatilgan. To‘qayev hech bir partiyaning a’zosi emas, oktabr oyida uning nomzodi Qozog‘iston Milliy ko‘ngillilar tarmog‘i va mamlakat Fuqarolik alyansi tomonidan ko‘rsatilgan edi.
Tengrinews xabar berishicha, saylovda Majilis (parlament quyi palatasi) raisi Yerlan Koshanov, Senat (yuqori palata) spikeri Maulen Ashimbayev, bosh vazir Alixan Smailov, Olmaota shahri hokimi Yerbolat Do‘sayev, To‘qayev va boshqa nomzodlar allaqachon o‘z ovozini berdi.
To‘qayev Qozog‘istonda muddatidan oldin prezidentlik saylovlarini o‘tkazish to‘g‘risidagi farmonni 21-sentabr kuni imzolagan edi. Avvalroq u mamlakatning siyosiy tizimini isloh qilgan, yangi konstitutsiyaga ko‘ra, prezident yetti yilga va faqat bir muddatga saylanadi.
Izoh (0)