Avstraliyalik milliarder Endryu Forrest Ukrainaning urushdan keyingi iqtisodiga ko‘maklashish uchun keng ko‘lamli sarmoya kiritilishini e’lon qildi. Bu haqda The Sydney Morning Herald xabar berdi.
Uning so‘zlariga ko‘ra, 17-noyabr kuni Ukraina iqtisodiyotini tiklashni moliyalashtirish uchun Avstraliya poytaxtida Forrest 497 million dollar sarmoya kiritadigan investitsiya fondi ochilgan.
Ukraina hukumati jamg‘arma mablag‘laridan foydalangan holda eng yangi texnologiyalar asosida zamonaviy infratuzilma qurishi rejalashtirilmoqda.
Ukraina xalqi, umuman olganda, butun dunyo mamlakat iqtisodiyotiga zudlik bilan sarmoya kiritishni boshlash kerakligini tushunishi uchun biz katta investitsiya fondini yaratyapmiz, — dedi Forrest.
Jahon banki prognoziga ko‘ra, urush sabab Ukraina iqtisodiyoti yil oxirigacha taxminan 35 foizga kamayadi.
Bank Ukraina iqtisodiyotining tiklanishini 349 milliard dollarga baholagan.
Urush ma’nosiz davom etar ekan, Ukraina tiklanish va qayta qurish loyihalari uchun katta moliyaviy yordamga muhtoj bo‘lib qolmoqda, — dedi Jahon bankining Yevropa va Markaziy Osiyo bo‘yicha vitse-prezidenti Anna Bjerde.
Aprel oyida Jahon banki 2022-yil oxiriga kelib YIMning 45,1 foizga qisqarishini bashorat qilgan edi. Keyin tashkilot xalqaro hamjamiyatni mamlakatni moliyaviy qo‘llab-quvvatlashga chaqirgan.
Avvalroq Ukrainadagi urush olti oy ichida global narxlarga qanchalik ta’sir qilgani haqida xabar berilgandi.
Izoh (0)