O‘zbekiston 2022-yil uchun e’lon qilingan Global innovatsiyalar indeksida (GII) 132 ta mamlakat orasida 82-o‘rinni egalladi. Bu haqda “Energyprom.kz” xabar bermoqda.
Innovatsiyalarni rivojlantirish bo‘yicha global tadqiqot har yili Jahon intellektual mulk tashkiloti va Insead xalqaro biznes maktabi tomonidan taqdim etiladi. GII milliy innovatsion ekotizimlarning sifatini baholaydi.
Strategik rivojlantirish doirasida O‘zbekiston eksportga yo‘naltirilgan mahsulotlarga sarmoya jalb qilish uchun Markaziy Osiyodagi innovatsion rivojlanish markaziga aylandi.
Mamlakatda innovatsion faollikning o‘sishi kuzatilgan. Uning mintaqadagi asosiy raqobatchisi Qozog‘iston bo‘lib reytingda bir pog‘ona pastda — 83-o‘rinni egallagan. Reytingda Qirg‘iziston 94-o‘rinda qayd etilgan bo‘lsa, Tojikiston 104-o‘ringa baholangan.
O‘zbekiston yil davomida 86-o‘rindan 82-o‘ringa ko‘tarildi va xalqaro ekspertlarning baholashicha, Hindiston va Eron bilan bir qatorda Markaziy va Janubiy Osiyoda innovatsiyalarni rivojlantirish bo‘yicha kuchli uchlikka kirdi.
O‘zbekistonda innovatsion ekotizimning rivojlanish sur’atlari kutilganidan yuqori bo‘lgan. Qozog‘istonda esa aksincha prognoz qilinganidan past bo‘lgan.
Innovatsiyalar indeksi yettita analitik blokni o‘z ichiga oladi. Institutlar, inson kapitali, infratuzilma, bozor va biznes rivojlanishi, texnologiya va ijodiy faoliyat natijalari baholanadi.
1-apreldan boshlab O‘zbekistonda TashRush dasturi ishga tushgan, uning doirasida IT Park xodimlari xorijiy IT kompaniyalarga o‘z bizneslarini O‘zbekistonga ko‘chirishda yordam bermoqda.
Izoh (0)