Joriy yilning oktabr oyi boshidan buyon O‘zbekistonda bodringning ulgurji narxlari dinamikasida mavsumiy o‘sish kuzatilmoqda. Biroq 2022-yilda ushbu mahsulot narxi o‘tgan yillarning shu davridagiga nisbatan ancha tez o‘syapti. Bu haqda EastFruit xabar bermoqda.
So‘nggi haftada ushbu mahsulotning o‘rtacha ulgurji narxi bir yarim barobar, 2022-yilning oktabr oyi boshidan noyabr oyining birinchi o‘n kunligi oxirigacha bo‘lgan davrda esa uch barobar oshdi.
Bundan tashqari silliq kalta bodringning joriy ulgurji narxlari o‘tgan yillardagi shu davrda qayd etilgan darajadan kamida 2,5 barobar yuqori.
Ma’lumotlarga ko‘ra, 2022-yil 4-noyabrdan 11-noyabrga qadar O‘zbekistonda silliq kalta bodringning o‘rtacha ulgurji narxi 1 kg uchun 12 000 dan 18 000 so‘mga oshdi.
Ushbu mahsulot narxlarining mavsumiy o‘sishi (2022-yil oktabr oyi boshidan 11-noyabrgacha) — 1 kg uchun 6 000 dan 18 000 so‘mgachani tashkil etdi.
2022-yilning 11-noyabr holatiga ko‘ra, kalta silliq bodringning o‘rtacha ulgurji narxi 2021-yilning xuddi shu sanasiga nisbatan 2,6 barobar va 2020-yilning shu sanasiga nisbatan roppa-rosa 3 barobar yuqoridir.
O‘zbekiston ichki bozorida bodring narxi bunday keskin oshishiga eksportyorlarning ushbu mahsulotga nisbatan faol talabi ham qo‘shimcha omil bo‘ldi.
Dastlabki rasmiy statistik ma’lumotlarga ko‘ra, 2022-yil oktabr oyining ikkinchi yarmida O‘zbekiston 1,8 ming tonna bodring eksport qilgan, bu o‘tgan yilning shu davriga nisbatan 2,3 barobar va 2020-yilning shu davriga nisbatan qariyb 13 barobar ko‘pdir.
EastFruit meva-sabzavot mahsulotlarining ulgurji narxlarini har hafta kuzatib boradigan mamlakatlar orasida O‘zbekistonda silliq kalta bodringning amaldagi narxlari eng yuqori hisoblanadi.
Taqqoslash uchun qo‘shni Tojikistonda ushbu mahsulotning o‘rtacha ulgurji narxlari O‘zbekistondagidan 2 barobar past.
Izoh (0)