Жорий йилнинг октябрь ойи бошидан буён Ўзбекистонда бодрингнинг улгуржи нархлари динамикасида мавсумий ўсиш кузатилмоқда. Бироқ 2022 йилда ушбу маҳсулот нархи ўтган йилларнинг шу давридагига нисбатан анча тез ўсяпти. Бу ҳақда EastFruit хабар бермоқда.
Сўнгги ҳафтада ушбу маҳсулотнинг ўртача улгуржи нархи бир ярим баробар, 2022 йилнинг октябрь ойи бошидан ноябрь ойининг биринчи ўн кунлиги охиригача бўлган даврда эса уч баробар ошди.
Бундан ташқари силлиқ калта бодрингнинг жорий улгуржи нархлари ўтган йиллардаги шу даврда қайд этилган даражадан камида 2,5 баробар юқори.
Маълумотларга кўра, 2022 йил 4 ноябрдан 11 ноябрга қадар Ўзбекистонда силлиқ калта бодрингнинг ўртача улгуржи нархи 1 кг учун 12 000 дан 18 000 сўмга ошди.
Ушбу маҳсулот нархларининг мавсумий ўсиши (2022 йил октябрь ойи бошидан 11 ноябргача) — 1 кг учун 6 000 дан 18 000 сўмгачани ташкил этди.
2022 йилнинг 11 ноябрь ҳолатига кўра, калта силлиқ бодрингнинг ўртача улгуржи нархи 2021 йилнинг худди шу санасига нисбатан 2,6 баробар ва 2020 йилнинг шу санасига нисбатан роппа-роса 3 баробар юқоридир.
Ўзбекистон ички бозорида бодринг нархи бундай кескин ошишига экспортёрларнинг ушбу маҳсулотга нисбатан фаол талаби ҳам қўшимча омил бўлди.
Дастлабки расмий статистик маълумотларга кўра, 2022 йил октябрь ойининг иккинчи ярмида Ўзбекистон 1,8 минг тонна бодринг экспорт қилган, бу ўтган йилнинг шу даврига нисбатан 2,3 баробар ва 2020 йилнинг шу даврига нисбатан қарийб 13 баробар кўпдир.
EastFruit мева-сабзавот маҳсулотларининг улгуржи нархларини ҳар ҳафта кузатиб борадиган мамлакатлар орасида Ўзбекистонда силлиқ калта бодрингнинг амалдаги нархлари энг юқори ҳисобланади.
Таққослаш учун қўшни Тожикистонда ушбу маҳсулотнинг ўртача улгуржи нархлари Ўзбекистондагидан 2 баробар паст.
Изоҳ (0)