Afg‘onistonda “Tolibon” harakati Kobul aholisi uylariga videokuzatuv kameralari o‘rnatishi kerakligini ma’lum qildi. Bu haqda Hasht-e Subh Daily xabar berdi.
Kobul politsiyasi vakili Xolid Zadran bu harakatdan maqsad shahardagi xavfsizlik holatini yaxshilash ekanini aytdi. U turli mahallalarda advokatlar, masjid imomlari va nufuzli shaxslar bilan hamkorlikda kampaniya boshlangani va hozirgacha Kobul shahrining 15-mavzesiga ikki mingta kamera o‘rnatilganini ta’kidladi.
Zadranga ko‘ra, aholining xavfsizlikni ta’minlashdagi hamkorligini real tarzda isbotlash uchun uylar, binolar va bog‘larda videokuzatuv kameralari o‘rnatilishi kerak. Ayni paytda “Tolibon” bu kampaniya hamma uchun majburiy emasligi va moliyaviy imkoniyati bo‘lganlar buni qilishi majburiyligini aytdi.
Avvalroq Afg‘onistonda “Tolibon” hukumati ayollarni Ichki ishlar vazirligining jamoat xavfsizligi bo‘linmalaridan biriga xizmatga qabul qilishni boshlagandi. Katta ehtimol bilan ulardan ayollar ishtirokidagi namoyishlarga qarshi kurashishda foydalaniladi.
Izoh (0)