Ukraina Tashqi ishlar vazirligi Moskvadagi qamoqxonada jazo o‘tayotgan Zambiya fuqarosi Ukrainadagi jangda halok bo‘lganiga munosabat bildirdi. Bu haqda Fokus.ua xabar berdi.
TIV spikeri Oleg Nikolenko hodisa haqida fikr bildirib, Afrika yetakchilarini o‘z fuqarolarini Ukrainaga qarshi kurashga yo‘l qo‘ymaslikka chaqirdi. Rossiya hukumati qamoqdagi afrikaliklarni Ukrainaga qarshi agressiv urush olib borishga safarbar qilayotgani, ushbu siyosat 23 yoshli Zambiya fuqarosi Lemehani Nyirendaning o‘limiga olib kelganini aytdi.
“Biz Afrika Ittifoqi va barcha Afrika davlatlarini Rossiyadan fuqarolarini urushga majburan yollashni bas qilishga chaqiramiz. Afrikaliklar Putinning xasta imperatorlik ambitsiyalari uchun o‘lmasligi kerak”, — deydi TIV vakili.
Ukrainada vafot etgan Zambiya fuqarosi Moskvaga atom muhandisligi sohasida ta’lim olish uchun kelgan. Afrikalik talaba 2020-yil giyohvand moddalar tarqatgani uchun 9,5 yilga qamalgan. Kreml sentabrda Zambiya fuqarosi vafot etganini e’lon qilgan. Zambiya rasmiylari voqea tafsilotlari uchun Rossiyaga murojaat qilgan, biroq Rossiya tomonidan hech qanday javob bo‘lmagan. Lemehani Nyirendaning otasi o‘g‘lining Rossiya Qurolli kuchlari safiga qanday qo‘shilganini bilmasligini aytgan.
Shundan so‘ng Zambiya Rossiya hukumatidan Moskvada qamoq jazosini o‘tayotgan fuqarosi Ukrainadagi urushga qanday jalb etilgani va halok bo‘lgani haqida zudlik bilan ma’lumot berishni talab qilgan.
Izoh (0)