Turkiyaning Safranbolu shahridan bo‘lgan Rumeysa Gelgi qaysidir sohadagi yutuqlari bilan emas, balki baland bo‘yi tufayli butun dunyoga mashhur. Qiz hozirda 25 yoshda bo‘lishiga qaramay, bo‘yi 215 sm ga teng.
Gap shundaki, Rumeysaning bunday o‘sishiga sabab Uiver sindromi (tug‘ilish paytida Turkiyada qayd etilgan birinchi holat) — juda kam uchraydigan genetik kasallik bo‘lib, bo‘yning tez o‘sishi skelet va ichki organlar rivojlanishidagi anomaliyalar bilan birga kechadi.
Rumeysa birinchi marta 18 yoshida Ginnesning rekordlar kitobiga kiritilgan (o‘sha paytda uning bo‘yi 213 sm edi). 2014-yilda u dunyodagi eng uzun o‘smir deb topildi. 2021-yil oktabr oyida u dunyodagi eng uzun bo‘yli ayolga aylandi va hozirgacha bu nomni saqlab turibdi.
Bundan tashqari, Ginnesning rekordlar kitobiga ko‘ra, Gelgi ayollar orasida eng uzun barmoqlar, eng katta qo‘llar va eng uzun bel egasidir.
Albatta, bunday og‘ir kasallik bilan yashash oson emas — 1 yoshidan boshlab Rumeysa juda ko‘p operatsiyalarni boshdan o‘tkazdi, shu jumladan, tug‘ma yurak nuqsonlari va skolyoz bilan bog‘liq jarrohlik amaliyotini ham. Shuning uchun ham Gelgi sayr qilishi uchun nogironlar aravachasidan foydalanishi kerak.
Ayni paytda qizning so‘zlariga ko‘ra, uning salomatligi barqaror. Rumeysa 2016-yilda o‘rta maktabni tamomlagan, shu yilning mart oyida esa Garvard universitetining sertifikatini olgan.
Sentabr oyining oxirida Gelgining samolyotda birinchi parvozi amalga oshirildi. Albatta, parvoz boshqalarga o‘xshamagan o‘ziga xos edi, chunki Turkish Airlines ekonom-klassdan oltita o‘rindiqni olib tashladi.
Hammasi yaxshi o‘tdi va Rumeysa San-Fransiskoga sog‘-omon qo‘ndi. Qiz ijtimoiy tarmoqlarda o‘z his-tuyg‘ulari bilan o‘rtoqlashdi va parvoz “benuqson”, ekipaj a’zolari esa “aqlbovar qilmaydigan darajada mehribon va mas’uliyatli” bo‘lganini aytdi.
Amerikadaligida Gelgi Apple kompaniyasining Silikon vodiysidagi bosh qarorgohiga tashrif buyurgan, chunki u hayotini texnologiya sanoati bilan bog‘lashni orzu qiladi. Qiz, shuningdek, Yevropa bo‘ylab sayohat qilishni va butun dunyo bo‘ylab xuddi shu kasallikka chalingan odamlarga yordam berishni rejalashtirmoqda.
Mavzuga doir:
Izoh (0)