Туркиянинг Сафранболу шаҳридан бўлган Румейса Гелги қайсидир соҳадаги ютуқлари билан эмас, балки баланд бўйи туфайли бутун дунёга машҳур. Қиз ҳозирда 25 ёшда бўлишига қарамай, бўйи 215 см га тенг.
Гап шундаки, Румейсанинг бундай ўсишига сабаб Уивер синдроми (туғилиш пайтида Туркияда қайд этилган биринчи ҳолат) — жуда кам учрайдиган генетик касаллик бўлиб, бўйнинг тез ўсиши скелет ва ички органлар ривожланишидаги аномалиялар билан бирга кечади.
Румейса биринчи марта 18 ёшида Гиннеснинг рекордлар китобига киритилган (ўша пайтда унинг бўйи 213 см эди). 2014 йилда у дунёдаги энг узун ўсмир деб топилди. 2021 йил октябрь ойида у дунёдаги энг узун бўйли аёлга айланди ва ҳозиргача бу номни сақлаб турибди.
Бундан ташқари, Гиннеснинг рекордлар китобига кўра, Гелги аёллар орасида энг узун бармоқлар, энг катта қўллар ва энг узун бел эгасидир.
Албатта, бундай оғир касаллик билан яшаш осон эмас — 1 ёшидан бошлаб Румейса жуда кўп операцияларни бошдан ўтказди, шу жумладан, туғма юрак нуқсонлари ва сколёз билан боғлиқ жарроҳлик амалиётини ҳам. Шунинг учун ҳам Гелги сайр қилиши учун ногиронлар аравачасидан фойдаланиши керак.
Айни пайтда қизнинг сўзларига кўра, унинг саломатлиги барқарор. Румейса 2016 йилда ўрта мактабни тамомлаган, шу йилнинг март ойида эса Гарвард университетининг сертификатини олган.
Сентябрь ойининг охирида Гелгининг самолётда биринчи парвози амалга оширилди. Албатта, парвоз бошқаларга ўхшамаган ўзига хос эди, чунки Turkish Airlines эконом-классдан олтита ўриндиқни олиб ташлади.
Ҳаммаси яхши ўтди ва Румейса Сан-Францискога соғ-омон қўнди. Қиз ижтимоий тармоқларда ўз ҳис-туйғулари билан ўртоқлашди ва парвоз «бенуқсон», экипаж аъзолари эса «ақл бовар қилмайдиган даражада меҳрибон ва масъулиятли» бўлганини айтди.
Америкадалигида Гелги Apple компаниясининг Силикон водийсидаги бош қароргоҳига ташриф буюрган, чунки у ҳаётини технология саноати билан боғлашни орзу қилади. Қиз, шунингдек, Европа бўйлаб саёҳат қилишни ва бутун дунё бўйлаб худди шу касалликка чалинган одамларга ёрдам беришни режалаштирмоқда.
Мавзуга доир:
Изоҳ (0)