“Tabib” filmi orqali barchaga tanish bo‘lgan Anna Dimna aynan Marisa roli tufayli mashhurlikka erishgan, deb yozadi “Kinoafisha”.
Dimna familiyasi esa uning hayotiga katta ta’sir ko‘rsatgan polshalik aktyor — birinchi turmush o‘rtog‘iga tegishli ekani ko‘pchilikka noma’lum. Anna Dzyadik bolaligidan aktrisa bo‘lishni orzu qilgan va teatr maktabini tugatgach, Krakovdagi Eski teatr truppasiga qo‘shilgan.
Ko‘p o‘tmay, u yerda sevgilisi Veslav Dimnani uchratdi. Ammo juftlikning baxti uzoqqa cho‘zilmadi, oradan besh yil o‘tgach, Anna kvartirada turmush o‘rtog‘ining jonsiz jasadini topdi. Afsuski, o‘sha vaqtda Veslavning spirtli ichimliklar bilan jiddiy muammolari borligi haqida mish-mishlar tarqalgandi.
Bu ham yetmaganidek, 27 yashar go‘zal aktrisaning hayotiga yana bir zarba berildi. Mashina boshqaruvi vaqtida uxlab qolgan Anna baxtsiz hodisaga uchradi. Aktrisa jiddiy jarohat oldi va tom ma’noda yurishni qayta o‘rgandi. Fizioterapevt Zbignev Shota unga hamma narsada yordam berdi va tez orada shifokor hamda bemor o‘rtasidagi munosabatlar muhabbatga aylandi. Shota bilan turmush qurgan Anna yakka-yu yolg‘iz o‘g‘li Mixailni dunyoga keltirdi.
Baxtsiz hodisadan so‘ng salomatligini tiklagan aktrisa “Tabib” filmida rol ijro etdi va shundan keyin Anna Dimna mashhur aktrisa sifatida e’tirof etildi. Ammo uning oilasi buzilib ketdi. Yillar o‘tib, u uchinchi turmush o‘rtog‘i — teatr rejissori Kshishtof Orzexovskiy bilan uchrashdi.
Ayni damda Marisa 71 yoshni qarshi olgan. U xayriya ishlari bilan shug‘ullanadi va hatto jismoniy va aqliy zaif odamlarga yordam beradigan jamg‘arma tashkil qilgan. Aktrisa ular uchun musiqa va teatr festivallarini uyushtiradi.
Dimna radikulit — orqa miya nervlarining shikastlanishidan azob chekadi, lekin u o‘zining asosiy vazifasi sifatida odamlarga yordam berishni unutmaslikka harakat qiladi.
Izoh (0)