“Daryo” nashrining YouTube’dagi kanalida ijtimoiy tarmoqlarda mashhurlikka erishgan xonanda Osman Navro‘zov bilan suhbat tashkil qilindi. Xonanda Osman Navro‘zov yulduzlik kasaliga chalinishidan qo‘rqishi, musofir bo‘lishiga san’at sabab bo‘lgani, Rossiya bir necha marta borib omadi kelmagani, dadasi u uchun 10 yil ishlagani, ijodini turkman tilidan boshlagani, “Lyubimaya” taronasining g‘oyasini 50 dollarga sotib olgani, klipini esa 5000 dollarga olgani haqida gapirib berdi.
Yulduzlik kasaliga chalinishdan qo‘rqishi haqida
Ko‘p marta yulduz bo‘lganimni aytishgan. Men esa eng birinchi navbatda yulduzlik kasaliga chalinishdan qo‘rqaman. Masalan, ko‘chaga chiqsam boshimga nimadir kiyib olishim kerakligini aytishadi. Men esa shu xalqning ichidan chiqib, ular orqali tanilgan bo‘lsam, nima sababdan bunday qilishim kerak, deyman. Toshkentgami, Xorazmgami yoki Qoraqalpog‘istonga borsam ham, bemalol aylanib yuravaveraman. Bu menga yoqmaydi, — deydi xonanda.
“Maktabni tugatib, pasportimni olishim bilan Rossiyaga ishlashga ketganman”
Moskavaga ketishimga san’at sabab bo‘lgan. Men kichkinaligimdan san’atga qiziqqanman, maktabga paytida ham qo‘shiq ayttirishganda birinchi o‘zim doskaga chiqar edim. Men 1991-yilda tug‘ilganman, 120 ta o‘quvchi bo‘lsa hammadan oldin yugurib chiqar edim. Kichkinaligimda laganni urib o‘tirganman, bilmasam ham u yoki bu xonandaning qo‘shiqlarini aytib yurar edim.
Keyin otam meni shifokor qilaman deb akademik litseyga o‘qishga bergan. Hattoki borib hujjatlarimni va diplomimni olmaganman. Faqat san’atga qiziqqanman. Maktabni tugatib, pasportimni olishim bilan Rossiyaga ishlashga ketganman, — deydi Osman Navro‘zov.
“Otam men uchun Rossiyada 10 yil ishladi”
Birinchi borganimda ishlarim uncha yurishmadi, rus tilini bilmas edim, uncha o‘xshamadi. Uyga borib kelib, yana ketdim. Rossiyada qurilishda ishlaganman, ustalarning oldiga borib barchasini o‘rgandim. Ozgina pul yig‘ib keldim, yana bo‘lmadi. Ko‘pchilikning qo‘shiqlarimni olib aytaverdim, o‘xshamadi, yana Rossiyaga ketdim.
Otam men uchun Rossiyada 10 yil ishladi. Topganini menga sarfladi, yiqilsang ham oldinga yiqil, dedi. Oxirgi marta 2014-yilda Rossiyaga ketdi. Otamning ishlari yaxshi bo‘lgan, u payt mashinam ham yo‘q edi. Uyim bilan studiyaning orasi 60-70 kilometr chiqar edi, shunga olti-yettita mashinaga minib borar edim. Uydan chiqaman, 10 kilometr to‘xtab, yana boshqa mashinaga minaman. Tinmasdan ishladim.
Millatim turkman bo‘lgandan keyin ijodimni turkman tili bilan boshlaganman. Vaqt o‘tib 2014-yilda “Gelsin yorim” nomli turkmancha ashulam chiqdi. Shundan keyin o‘zimizning turkmanlar orasida yaxshi tanildim, tinmasdan harakat qildim. Xit qo‘shiqlarimning ustida ishlagan akamga o‘zbek san’atiga o‘tmoqchiligimni aytdim. Turkmanlarda to‘y mavsumi boshlanib, vaqt o‘tib 20 kun to‘y bo‘lmasligi ham mumkin. Masalan, O‘zbekistonda to‘y xizmatlariga chiqib pul topiladi, konsertlar ham pullik bo‘lyapti. Sekin-sekin chiqib ikkita o‘zbekcha ashulam chiqdi, bittasi yaxshi ketdi, bittasi ketmadi, — deydi xonanda.
“Lyubimaya” taronasining g‘oyasini 50 dollarga sotib olgani, klip olishdagi qiyinchiliklar haqida
Avval to‘y xizmatlaridagi narximiz arzon bo‘lgan, pul yo‘q edi. Qiynalib yurar edim, qo‘shig‘imni efirga berishga pul topsam, boshqasiga pul topa olmas edim. Keyin qarasam telefonimning orqasida 50 dollar pul turgan ekan, “Lyubimaya”ni ko‘rsam esimga tushadi. Bu qo‘shiqni TikTok’da eshitib qoldim, Po‘lat Rahmon degan bola bor edi, g‘oya o‘sha insonga tegishli. Shu qo‘shiqni menga ber, dedim. U 50 dollar bersam, qo‘shiqning g‘oyasini menga berishini aytdi. Qarab turib telefonimning orqasini ochsam 50 dollar chiqdi, mana deb unga berdim. Hayron qoldim, xuddi bir joydan kelgandek bo‘ldi. Qo‘shiqni sotib olib, bir marta kuyladim, biroq mashhur bo‘lmadi. Olti oydan keyin yana qayta kuyladim.
O‘sha paytlar men uchun 2 000 dollar katta pul bo‘lgan, chunki bir millionga to‘yga chiqar edim. Bitta to‘yga olti soat xizmat qilar edik. “Lyubimaya”ga klip oldik, oxirida bir million pul yetmayapti. Klipni administratorim olgan, bu gapni menga aytgandan keyin klip kerak emas deb aytdim. To‘yda turibman, xabar yozadi, telefon qiliadi. Keyin men hammasi jonimga tegdi, o‘chir, hech narsa kerak emas deb aytdim. U shuncha ish bitdi, yana bir million pul kerak deb aytdi. Toshkentda ham tanishim yo‘q, endi kelib yurgan paytim edi. Klip chiqqandan keyin, ‘prosmotr’ zo‘r bo‘ldi, aylandi. Hozir o‘ylab bu ham bir yaxshilik ekan deyman.
Qo‘shiqlarimni efirga kamroq beraman, bundan keyin unga ham kuch qaratyapman. Kichkinaligimda ozgina bo‘lsa ham tanilishni niyat qilgan edim. Kechalari yig‘lar edim, hech kim bilmagan. To‘ylarga borganda akalarim bilan kolonkalarni tushiraman. Haligacha esimda, Xorazmdagi telekanallarining birida birinchi marta efirga chiqishim kerak edi, kostyum-shim kiyib olganman. Sababi undan keyin to‘yga borishim kerak bo‘lgan. To‘y ko‘chada bo‘lgan, yomg‘ir, qor yog‘ib turibdi. Kolonkaning kabellari bir qarich loyning ichiga kirib ketgan. To‘y tugagandan keyin kolonkalarni yig‘ishtirish kerak bo‘lgan, kabel sovuqdan qotib qolgan, kostyum-shimim yarmigacha loy bo‘lgan”, — deydi Osman Navro‘zov.
“Otam 2 000 dollar jo‘natsa, 100-200 dollarini uyga berib, qolganini ijodga sarflaganman”
Otam men senga ishonaman, hali hammasini uddalaysan, deb aytgan. Sahnaga chiqish uchun ham moddiy tomonlama qo‘llab-quvvatlash bo‘lmasa qiyin. Insonni o‘zida harakat bo‘lmasa undan ham qiyin. Otam oxirgi marta Moskvaga ketganida ‘seni mashhur qilaman’ deb ketgan, shu bilan uch yarim yildan keyin kelgan. U payt uylanmagan edim, keyin otam 2 000 dollar jo‘natsa, 100-200 dollarini uyga berib, qolganini ijodga sarflaganman.
Qo‘shiqlarimning bittasi mashhur bo‘lsa, bittasi ketmas edi, o‘shanda ham tushkunlikka tushmaganman. Otam yordam beradi deganman, keyin Moskvaga ketaman deb qolsalar, yo‘q ketmaysiz, siz ketsangiz, ishlayotgan pullarim ham ketib qoladi, deyman. O‘zim ham o‘rganib qolganman, xizmatga borib kelib pulini darrov otam bilan onamga beraman. Menda homiy bo‘lmagan, cho‘ntagimni to‘ldirib pul topmaganman. Uyda yolg‘iz o‘g‘ilman, mendan keyin uchta singlim bor. Otam asosiy homiyim, — deydi xonanda.
Mavzuga doir:
- Janob Rasul, Osman Navro‘zov va Jaloliddin Ahmadaliyev. Internet yulduzlarining “birrov”i qancha?
- Ukrain, rus, qozoq va eroniy — o‘zga millat vakili bo‘lsa-da, sof o‘zbek tilida ijod qilayotgan mashhurlar (foto)
- “Jo‘ji qoro”, “Akaxonlarim”, “Eh, jo‘ralar”. Hayotdagidan ko‘ra YouTube’da mashhur bo‘lgan o‘zbekistonlik san’atkorlar (video)
Izoh (0)