O‘zbekistonda chet el fuqarolari tomonidan O‘zbekiston hududidan chiqib ketishdan avval xarid qilingan tovarlar uchun qo‘shilgan qiymat solig‘ini (QQS) qaytarish tizimi yo‘lga qo‘yiladi. Bu haqda Davlat soliq qo‘mitasi xabar bermoqda.
Xorijiy davlat fuqarolariga ayrim turdagi tovarlarni sotib olishda to‘langan QQS summasini qaytarish – “tax free” tizimi tajriba tariqasida joriy etiladi.
Tax free qaysi mahsulotlarga tatbiq etiladi?
Tax free O‘zbekistonning barcha hududlaridagi chakana savdo obyektlarida qaror bilan tasdiqlangan ro‘yxatga kiritilgan tovarlarga nisbatan qo‘llaniladi.
Qancha miqdorda xaridni amalga oshirish lozim?
Umumiy qiymati kamida 1 mln so‘m bo‘lgan “tax free” tizimi tatbiq etiladigan tovarlarni xarid qilish lozim.
Chet el fuqarolari Tax Free’dan qanday foydalanishi mumkin?
Buning uchun chet davlat fuqarosi “Soliq” mobil ilovasida ro‘yxatdan o‘tishi va xaridlari bo‘yicha taqdim etilgan onlayn-NKT fiskal cheklarini skanerlashi kerak.
Tax free summasini hisoblash, uni chet davlat fuqarosining bank plastik kartasiga yoki bank hisobvarag‘iga o‘tkazib berish tizim operatori “Soliq-servis” tomonidan amalga oshiriladi.
Ushbu jarayonlarni Soliq mobil ilovasida onlayn vaqt rejimida kuzatib borish imkoniyati yaratiladi.
Chet davlat fuqarolari O‘zbekiston hududini Toshkent, Samarqand, Buxoro, Farg‘ona va Urganch xalqaro aeroportlari orqali tark etganda tizim operatoriga murojaat qilgan holda mahsulot xarid qilgan paytdan boshlab 3 oy ichida QQS summasini qaytarishni rasmiylashtirishlari mumkin bo‘ladi.
To‘langan soliq summalari qachon qaytariladi?
Tax free summasi chet davlat fuqarosining O‘zbekiston hududidan chiqib ketish holati tasdiqlangan so‘ng, xarid amalga oshirilgan oydan keyingi oyning 25-kunidan keyin qaytariladi.
Izoh (0)